袁偉豪出爆肌寫真　賀入行20年

袁偉豪與苟芸慧昨日在沙田馬場，出席2017東方表行沙田錦標「時尚煲呔賽馬日」。兩人聯同東方表行集團董事總經理楊衍傑伉儷、東方表行集團主席楊明標伉儷、東方表行集團執行董事林慶麟及蔡國欽、東方表行集團顧問馮廣耀，與香港賽馬會賽馬業務及營運執行總監祁立賢主持祝酒及揭幕儀式。

孖女友玩街拍

以煲呔打扮示人的袁偉豪自言平日較多打領帶，但最近也開始研究煲呔，覺得可以代表男士衣着品味，並要多向公司的服裝部同事學習。問到會否跟女友張寶兒一齊揀衫？他坦言：「有，呢方面大家都幾投契，會一齊研究衣着打扮，我又鍾意揸機影相，佢就做我模特兒，大家玩吓街拍。（幫女友出相集？）都想。」提到袁偉豪與女友的定情節目《打工捱世界II》前晚奪得《星和無綫電視大獎2017》「我最愛TVB綜藝節目」，他笑言事前沒有想起此乃定情作，故在現場亦忘了多謝主持之一的女友，但事後已私下多謝對方，又冧爆表示這個節目最大得着是識到女友。此外，袁偉豪又自爆計劃推出個人相集，作為入行20周年的紀念：「我會請攝影師影我，由我自己策劃，近年有少少成績，而且又Keep到個Body，想留倩影，相集扣除開支會作慈善用途。」

回歸大自然

至於早前參與米蘭時裝周的苟芸慧，稱愈來愈喜歡時裝，她說：「今日個活動同時尚有關，可以參加好開心，我希望將來可以攞到同時尚有關嘅獎。」提到賽馬，苟芸慧自言經常跟朋友入馬場，自小已學策騎的她也有意養馬：「我知好多馬退役後可以養，想同朋友一齊養，因為養馬都好貴。我諗過喺加拿大買個農場養馬，我鍾意大自然環境，想自己種嘢食。」

現場星光熠熠，其他出席賓客包括藝人梁嘉琪、顏子菲、莊思敏、莊思明、名模Rosemary、名人王嘉恩、伍士榮、幸正權夫婦、雷怡暉、許慧莊及煲呔設計師王偉旭等，場面熱鬧。

江若琳點醒男友預演婚禮

藝人江若琳（Elanne）與男友蕭潤邦（Oscar）昨日首次以情侶檔現身馬場，穿着由設計師張永康設計的晚裝及禮服行騷， Elanne全程小鳥依人挨實男友晒恩愛。問到是否預演婚禮？Oscar笑言今日打扮是30幾年來最「行」，但結婚時會更「行」：「頭先同Elanne玩自拍，都睇唔慣自己，遮住塊面。」Elanne笑指男友打扮似桌球選手。Oscar表示女友已第三年行騷，清楚走位，自己則非常緊張：「我都有問佢好多次點行，佢叫我個樣唔好咁僵，我唔知行騷可以笑，已經生晒銹。」Elanne笑言男友問了十多次， 教到吐血，講極唔明。兩人還在馬場偶遇相熟的卓悅老闆，對方的馬匹勝出，邀請他們一同拉頭馬沾沾旺氣。

而同場任司儀的藝人楊洛婷產後首度復出，指五星期大的女兒黃子霏是大食妹，每餐食8安士奶：「呢個係三、四個月嘅食量，一個月已經重咗3磅幾，依家應該有10磅。佢嘅食量好驚人，同我一樣，唔食唔得，否則會發脾氣，前一晚佢飲咗超過8安士奶，破晒紀錄，佢依家有三下巴。」

洪卓立不敢下注怕損手

歌手洪卓立與皮草太子爺王大業（Andy），昨日響應主題齊齊以煲呔造型示人。獲頒「最佳煲呔衣著大獎」的洪卓立，自言打煲呔後特別醒神，要多謝設計師張永康為他度身訂造服裝。因工作關係，每年有三、四次到馬場的他，坦言不敢下注：「因為之前幾次買親都損手，覺得自己冇乜橫財運，有次陪個親戚入場，我仲輸得多過佢。」

而Andy則透露家中收藏30多個煲呔：「見到靚就買，喺馬場或者出席晚宴都會戴。」剛返港的他，表示去了俄羅斯、法國及芬蘭旅行：「我去到芬蘭第一日已經睇到北極光，酒店啲人都話我好好彩。（同女友去？）同朋友，有男有女。」