再生睇天意　郭羨妮安排囡囡讀傳統學校

藝人郭羨妮、黃淑儀和曾航生等為電台劇集《獅子山下》到西環座一古廟拍攝外景。郭羨妮說：「個故事幾有趣，所以佢哋一問我就即刻話拍，雖然拍兩日，但拍攝時間非常長，每日拍成18個鐘。」

劇中郭羨妮與曾航生飾演一對夫婦，講述求子心切拜神問卜。問只育有一女的郭羨妮可會否順道求埋？她笑說：「一路拍嘅時候個心一路求，呢啲嘢我已放鬆，唔會再刻意諗，人哋話刻意唔得，真係唔得，所以放鬆啲，依家心態係冇咪唔緊要，我都有個女，可以好好栽培我個女，真係需要好多時間栽培。」

囡囡將於2018年升讀小學，過去一年不停帶女兒去考小學，她說：「尋日先考完，我都報咗7、8間，唔算多，有啲人真係漁翁撒網，但我覺得好攰，我個女話好鍾意interview（面試），覺得好好玩。」她沒有考慮幫安排女兒報讀國際學校，希望孩子從小入讀傳統學校：「如果入唔到傳統小學，就可能報讀IB（國際文憑）嗰種學校，比較輕鬆。」

日前是郭羨妮與導演老公朱少杰結婚6周年紀念，她笑說：「老公返咗嚟五日，佢返嚟已經好開心，都係行街食飯買嘢。（佢有冇送嘢畀你？）有，不過佢買親畀我都唔啱，佢使好多錢買，但都唔啱我用，通常我都拎返去refund（退），然後我再買其他嘢。（叫佢折現？）係！佢成日折現，有次我生日，佢唔折現，好叻咁買咗兩舊美容機畀我，但我都唔用，我咪換番錢買啲家品。」她指老公每個月都會返港，剛到上海、北京工作，在北京時便與老公見面。