出走抑鬱開迷你個唱　姜麗文開工當拍拖

歌手姜麗文（Lesley）舉行迷你音樂會，獲叔叔姜大偉夫婦及哥哥姜文杰到場支持，而好友陳柏宇就擔任嘉賓。受訪時，Lesley表示之前感冒了幾日：「可能太興奮，由細到大爸爸媽媽都笑我每逢大事都會感冒，但今日應該ok嘅。」問到為何她相隔四年後重返樂壇？她表示：「因為我熱愛唱歌，之前四年係因為我唔開心有抑鬱症，所以要治療。（依家好番晒？）係呀，好開心好幸福。（用乜嘢方法好番？）其實我唔敢食藥，但有睇心理醫生，都有做運動，同埋去美國上心理科嘅class，又投入學音樂，當然仲有屋企人同朋友支持。」

唔怕撞番舊愛鄭俊弘

講到工作動向，Lesley透露之後會簽公司：「其實我2010年出道，一直都冇公司，所以想搵間錫我同一齊成長嘅公司。（幾時會公布？）好快。（聖誕節之前？）係。」問到她年尾可會出席頒奬禮？她謂：「唔知，我都好想。（如果出席怕唔怕見到舊愛鄭俊弘與其現任女友何雁詩？）我祝大家開開心心、身體健康、世界和平。（如果見到佢哋會唔會尷尬？）I don't think so，都過咗咁耐，我依家好開心，我學咗好多嘢、成長咗，最緊要大家開心同健康。」

拍拖講緣分

問到現時感情狀況？Lesley表示：「暫時工作係我男朋友，好開心可以返嚟做嘢，我好恨忙。（心態上ready有新戀情未？） 我ready先可以出到新歌，先至冇咗抑鬱症。（放低晒之前唔開心嘅嘢？）放低晒。（下次拍拖會唔會唔敢再咁投入？）我好肉麻，應該唔會嘅。（下次拍拖會唔會帶眼識人？）唔知呢，係講feel同緣分。（嗰段戀情令你學識啲咩？）之前嘅嘢唔講，想注重依家嘅我，我依家好開心，情緒上同身體都好健康。」而講到不見爸爸秦沛來支持，她表示因爸爸要到內地拍戲，但有鼓勵她：「我哋好肉麻，佢講proud of you、good show，我都會拍片畀佢睇。」