杜德智讚杜德偉囝囝愈大愈可愛

藝人兼健身教練杜德智（Orlando）到中環為歌唱比賽擔任評判及表演嘉賓，他認為參賽者一定要有好的歌唱技能：「最緊要投入到，平時唱K係一回事，但出到嚟一定要有星味，例如對觀眾嘅感覺同表演嘅技巧。今次有Live Band，同樂隊協調都好緊要。如果唱得好，但冇表演嘅感受，我覺得係未夠。」提到不少人參賽時都飆高音，他覺得不一定好，外地很多世界級歌手都不是以高音為主：「佢哋技巧好好，唱出嚟好有Feeling，再加埋高音就係錦上添花，但唔可以用高音做準則。如果一味唱高音，又冇感覺，唱得唔好，拍子又唔準，咁唔夠。好似着衫咁，件衫好靚，但你個人冇性格，件衫都帶唔出個感覺。」

Orlando透露最近於廣州開了健身中心，並要繼續香港的健身事業：「要勤力參與，而音樂方面都要投入多啲，因為聖誕節嚟緊，有好多演出。生活非常豐富，最鍾意嘅嘢都可以同時做到。」提到弟弟杜德偉（Alex）的兒子，Orlando坦言最近不算見得太多，因為Alex很忙：「啱啱睇到佢啲相，不過見到我哋都會見嘅，會探吓佢哋，因為住得好近。BB愈大愈可愛，因為有反應，會試吓行，都企到幾吓。嗰日我同小方（方力申）跑步，撞到Alex同太太曬太陽，非常開心見到佢哋。」