天后容祖兒出席Philips飛利浦全新聲波震動牙刷發布會，她在台上分享用此牙刷的心得。受訪時講到她在Instagram表示她跟蔡卓妍（阿Sa）及鍾欣潼（阿嬌）嚟緊會有大Project，她解釋下周三會拍廣告：「好耐冇見阿嬌。（幾耐冇見？）都好幾個月，上一次見係我（六月）生日時，有時都只係喺網上見到佢。（係咪阿嬌掛住拍拖？）本身都好難約。（阿嬌重色輕友？）我唔好意思咁講，但有呢個嫌疑，不過佢之前都一直拍劇，阿Sa都係做嘢先見到。

萬聖節畀阿Sa飛甩

問到依家三人是否各自有另一半而少見？祖兒：「係呀，往年阿Sa萬聖節都會約我去蒲，但今時今日嘅佢有毛有翼啦，我要返屋企過。（你可以約男友劉浩龍？ ）我要返屋企，因為有啲小朋友會撳門鐘，要派糖畀佢哋。（男友都返你屋企？ ）冇啊！」

講到樂壇頒奬禮將至，問到是否四個頒奬禮都不會出席？祖兒坦言：「唔去啦，公司都同我有共識，今年休息一陣，我今年都冇歌。（你冇歌都可以角逐女歌手奬？ ）冇歌點角逐？（你唔去咪斷纜？）你哋唔好咁牽掛。」

唔想賴喺個寶座唔走

問到睇好今年誰人可以接捧？她表示：「唔好話接捧，我之前都講過，年年都係我其實都係唔健康，明明都係好，但都可能搞到有人覺得我阻住地球轉，我唔鍾意人咁諗我，我唔想為咗要蟬聯，就一世賴喺嗰個寶座度唔走。至於今年我就睇好衛蘭，我鍾意佢隻唱片，希望佢得獎，佢唱歌好好聽。（睇好佢攞女歌手獎？）唔知呀，總之我覺得佢今年係最叻。」

問到可想四台聯為一個頒獎禮？她表示：「年年都咁講，但四台有唔同嘅標準，要四個屋企住埋一齊都好難，我以前都會有期盼，但依家就知道呢件事只可能活喺黃色大門裏面。」她亦透露現時會雙線籌備工作，2018年會推出廣東碟及國語碟。