Hana曾遇車禍手同頸受傷　妹妹塊面腫晒

歌手JW、陳柏宇（Jason）、菊梓喬（Hana）、羅蘭、顏卓靈、葉巧琳等出席道路安全活動，接受訪問時，Hana表示自己擁有車牌但從未被扣過分，因為自己都好主意交通安全。問到可曾試過遇上交通意外，Hana直言15歲時同妹妹坐小巴在九龍塘撞車：「打咗個白鴿轉然後剷行人路，自己就手同頸郁唔到，妹妹就成塊面腫咗，但都淨係睇跌打。（有留下陰影？）咁又冇，但會小心啲，覺得自己揸車會好啲。」提到年底舉行的頒獎典禮，問到有否信心奪獎？她笑言：「過兩日出碟緊張啲，等咗好耐，都係Focus番出碟先，因為11、12月都會有好多宣傳。頒獎典禮就平常心，做到歌手已經好開心，會繼續努力去做個好歌手！」

問到同場的Jason與葉巧琳萬聖節有否去玩？Jason就表示自己平時都好少去蘭桂坊玩，而葉巧琳就透露往年都有裝扮，但今年就只是留在家打機，兩人都覺得有得Trick or Treat可以畀小朋友感受到萬聖節氣氛。問到Jason演唱會籌備成點，他坦言正積極練歌、操Fit同排舞。