林珊珊個女？陸永爆C君前女友係爛桃花

組合農夫於麥花臣場館舉行一連六場演唱會，演唱會結束後接受訪問，農夫笑言握手握到手軟，但係能夠睇到有咩人嚟睇自己個演唱會都幾好，笑言：「好似做調查咁，年齡都好闊，見到有小朋友，好似畀人迫嚟睇嘅小朋友，但係又見到睇得好開心嘅叔叔。」

拒提禁歌女歌手

至於問到原本合作唱嗰首禁歌嘅女歌手係邊個，兩人直言唔好講，因為始終首歌冇推出到，謂：「佢選擇可能係啱嘅，因為啲歌詞都幾激㗎嘛，或者佢好想唱，但公司覺得唔啱呢。（有諗過改歌詞？ ）咁就唔係嗰件事啦！」

嘟嘟子華合作好難搞

其後，問到係咪嘟嘟幫手搵子華，兩人即笑言非常難搞：「係我哋兩個分別搵嘅，其實我哋真係鍾意子華嘅，拍戲期間其實都未知道開騷，之後有次食飯問佢可唔可以做嘉賓，佢馬上就拒絕咗，但拍片佢又OK。但要夾埋嘟嘟啲期就幾勞師動眾，不過其實係嘟嘟提議㗎！」

陸永囡囡捱唔到全場

談到C君唱《好彩分手》時收到訊息一事，問到係咪當年同林珊珊女兒李澄分手有關，C君即話：「唔係！好耐喇！係分咗手咁耐唔記得喇！收到都既驚且喜唔知點回應。」而陸永就話：「你哋唔識㗎嗰個，係出面嗰啲爛桃花嚟㗎！」另外，提到家人冇嚟睇騷，陸永話原本大女背晒歌話嚟一齊玩，但今朝就同自己講加油：「不過都好嘅，都知道佢捱唔到兩個鐘，睇吓之後會唔會帶佢嚟半個鐘之後走囉。」