小心笑到瀨尿！肥媽黑妹玩完開騷冇難度

情如親姊妹的肥媽Maria和黑妹李麗霞於11月17及18日在伊館舉行「黑．媽媽笑住唱演唱會2017」，首度「孖住」開騷，黑妹稱原本檔期是她和Joe Junior，但因對方健康問題，所以，黑妹便邀肥媽一齊開騷。肥媽直言：「我舊年講過退休，你叫我自打嘴巴！群星我就唔會唱，但我老公就話幫下黑妹啦，咁我就諗『棟篤唱』未做過，一半棟篤笑，一半唱，咁都有新意又好玩，香港人最緊要正能量同開心。」

肥媽和黑妹說話都直腸直肚，低死搞笑，兩人笑言單是分享生活經歷，四小時都講不完，何況還要唱歌，現暫選了60首歌再篩選，並透露農夫、阮兆祥、陸浩明、羅敏莊來任嘉賓，Rundown都有排諗，兩人希望每個觀眾入場都笑得開懷：「我哋有幾個朋友要送定尿片畀佢，怕佢哋笑到瀨尿。」問會否在台上玩互爆瘀事？黑妹笑言：「慣啦，佢對住鏡頭就爆我啲嘢。」肥媽更踢爆黑妹「收兵」，有隊「黑妹兵團」：「追佢嘅人嚟自世界各地，諗住佢哋嚟就安排四面台分開坐，唔好一齊坐，咁你對住邊個方向唱情歌，佢哋都會覺得你對住佢唱。（肥媽見過晒？）見過兩個，仲有四個未見。」

問到演唱會只開兩場可會夠喉？兩人坦言已經有人傾去外地演出，肥媽稱已半退狀態，黑妹亦言要減工作量多陪家人，並計劃去泰國打哥爾夫球。演唱會即將舉行仍去玩樂？肥媽笑稱：「我哋演唱會唔使咁多準備，我哋喺外地演唱都係朝早打波，夜晚咪開演唱會囉。」黑妹亦表示：「我都係啱啱加拿大返嚟，去五日唱咗三場，打咗三場波。」而這對「高球雙妹嘜」竟對現場的「空中瑜伽」有興趣，更請Miss教她們擺幾個花式甫士來拍攝，十分搞笑。

場地：Elite Fitness & Beauty