周柏豪33歲生日　女神鍾浠文餵食蛋糕

歌手周柏豪近年既忙於唱歌又忙於拍劇，人氣高企！今日就係柏豪嘅33歲生日，人緣甚佳嘅佢早前已獲得唔少好友為佢慶生，柏豪亦曾表示未到正日都已經食咗八個生日蛋糕，認真厲害。

今日正日生日嘅柏豪就喺社交網上載一張一班好友同佢慶生嘅合照，相中見到連詩雅、鄭融、鍾浠文等亦有出席，有一大班人為佢慶生，難怪柏豪都笑得咁開心啦！而好友鍾浠文亦有喺網上同網友分享一段佢之前餵柏豪食蛋糕嘅片，留言：「生日快樂！祝你生活美滿，生意興隆wahahahhaha!!」片中見到柏豪個樣好似好唔情願，不過佢兩個一向都非常老友，相信柏豪都係扮吓唔情願，網友都大呼「這些機會不屬於我的」真令人葡萄，仲紛紛送上祝福呀！