黎小田新年騷 家燕𢭃利是陳美齡唱好歌
資深音樂人黎小田(Michael)到尖沙咀出席《屈臣氏冠軍蟲草呈獻小田金曲50年作品演唱會》記者會,宣布2018年2月17至18日(年初二至年初三)舉紅館開騷,門票將於11月14日公開發售。薛家燕、曾路得、麥潔文、柳影虹及胡渭康現身撐場,眾人在台上盡數Michael的經典作品,又分享當年合作的趣事。薛家燕笑言當年想找一個搞笑但個子不要太高的拍檔,結果與Michael一拍即合,更合作了接近40年。

七百逾首金曲好難揀

而Michael指農曆年期間很多歌手都要出埠搵食,加上很多人要去旅遊,因此不肯定開騷氣氛如何。問是否要給多點歌酬?他說:「冇呀,都係封利是,不過佢哋都唔志在呢樣嘢。(一呼百應?)好多都要登台,起碼都要打個招呼,好多都好幫手,『登台皇后』薛家燕都係。」屆時他將不會獻唱,由於作品太多,單是選曲已經要很花心思:「到時會知,都係好Hit嗰啲。《換到千般恨》嗰啲Hit到好犀利。(咩主題?)都係我嘅作品,七百幾首要揀幾十首真係好艱難。同埋好難得請到陳美齡,會唱我作畀佢嗰兩隻歌。」原來他是先致電陳美齡的家姐,然後電郵給陳美齡作出邀請。

薛家燕坦言為了演出這個音樂會而損失其他收入,但一定要為Michael出力:「佢話年初二,我話『吓?唔係呀?』但咁多年老友,有時唔係計錢嘅問題,我哋互相支持。(佢封大利是畀你?)呢個唔緊要,我哋冇計呢啲。」

冇登台失六位數收入

Michael即強調一定有大利是,自言本來不知道年初二開騷,因為是主辦單位入紙申請場地的。薛家燕認為兩人應該合唱,好想Michael開金口:「難得一齊,我年初二又唔去第度。(損失幾位數字?)計得到,起碼6位數字唔見咗!」說到只開兩場,Michael認為已經足夠:「因為有好多歌星幫手,如果好似溫拿咁跨年有乜所謂,5個人之嘛!」

薛家燕稱讚老拍檔有大量經典歌曲,很希望邀請原唱者演出,覺得演唱會是個盛會和開心事,又笑言會帶大袋上台𢭃利是:「Michael冇準備唔緊要,我自備,一定爭住出場同觀眾握手,同大家恭喜發財同𢭃利是。」說到共有接近30位歌手參與,Michael坦言新年檔期每個都很難請,又要想哪首歌適合哪位歌星唱,至於張國榮及梅艷芳的歌就未決定由誰演繹。