拍檔內訌?湯寶如開騷同曹永廉瘋狂互寸
歌手湯寶如(湯記)在九展舉行25周年演唱會,獲周慧敏、袁潔瑩等人到場支持,至於沒有到場嘅張學友、郭富城、草蜢等人亦有送上花籃祝福。開始湯記以豹紋長裙出場,唱出《獨愛》及《我們的近況》後向大家打招呼,她表示上次開騷是5年前:「咁就25年,估唔到時間過得咁快,你哋邊個上次有嚟睇20周年演唱會?」之後嘉賓曹永廉出場,兩人合唱《相思風雨中》,但兩人互相鬥嘴場面搞笑,當阿廉拖住湯記的手後,他就謂:「隻手好好肉,好有福氣。」湯記就反擊叫他不要緊張:「知你少做演唱會嘉賓,定啲嚟,要照顧老人家。」之後阿廉講笑講:「好開心可以做你25…記得你好似25歲入行,恭喜晒,即係咁就50歲,個樣唔似。」現年46歲的湯記即反擊:「就嚟追到你54歲。」

之後阿廉扶住湯記落台,湯記即謂:「梗係,唔係你拍《公公出宮》嚟做咩?」阿廉獨留在台上唱《愛與痛的邊緣》前,表示入行廿幾年第一次做演唱會嘉賓,又謂湯記不介意被他影衰:「我94年出道,佢92年出道,當時佢已經係遙不可及,係師姐,今年年頭可以同佢合作《流行經典50年》,仲有家燕姐(薛家燕)同小田(黎小田),有湯記喺度我信心大好多,因為佢NG多啲,佢呢9個月唔同晒,成個人fit晒!」認真抵死!

之後湯記換上西裝以中性打扮唱出《上帝之手》、《絕對是個夢》等快歌,並邀得嘉賓黃翊合唱《最愛的你》,她表示很欣賞對方唱歌。而黃翊送上自己的新單曲碟給湯記,亦謂妒忌湯記可以開騷,湯記即祝他快些開騷。唱出幾首慢歌後,嘉賓黎瑞恩出場與她合唱《乾一杯》,湯記重提5年前黎瑞恩為她做嘉賓時不慎在樓梯仆倒,她笑言:「5年前你做我嘉賓,今次為咗你特登冇整樓梯,成本慳番晒。」黎瑞恩亦謂:「上次我狀態唔係幾好,希望今次好啲。」湯記笑言:「冇樓梯、冇機關就冇事㗎啦。」接着黎瑞恩獨唱《雨季不再來》後返回後台。

----------------------------
東網巨星開咗ig喇,大家快啲follow啦!
https://goo.gl/KGuo2N