名人：生咗BB記性差　圓圓忘記結婚周年

名人蔡加讚太太汪圓圓出席萬希泉慈善午宴，她透露聖誕節會與家人到天氣熱的地方旅遊：呢排去嘅地方都凍，到時會同Karson（蔡加讚）、小朋友同家姐一齊去玩。（甄子丹都會一齊？）姐夫好慘要拍戲，所以唔理佢，得閒就Join，唔得閒都冇辦法，佢啲時間都難夾。」

汪圓圓表示女兒蔡婧妍（Celine）現時就讀K.1，而一對孖仔蔡靖天（Christian）及蔡靖曦（Kameron）一月就兩歲生日，問會否舉行大Party，她說：「其實個女年年都冇搞，三歲時搞咗個大嘅，記得嗰日八號風球，好慘啲人好遲先嚟到，但佢都好開心，而兩個仔就比較簡單。」

她直言近排都非常忙碌，忙到連明日（28日）與老公結婚四周年都忘記：「時間過得好快，本身聽日食飯，但之後有人約咗我聽日，我就好快咁應承咗，所以同Karson改咗今晚食飯，生咗BB記性差咗。（老公有冇投訴？）佢都OK，我冇點投訴佢，佢都冇投訴我，有次佢洗手整唔見咗結婚戒指，通常人哋會好嬲，但我就冇，結果半年後搵得番。（送份禮物畀佢？）聽日送，問佢聽日食咩，佢呃我話帶我去茶餐廳食飯。（好少二人世界？）係，但盡量都會一個月一次，佢都忙。」

提到蔡加讚家姐蔡加怡擔任主席的康健醫療，被證監會勒令停牌，汪圓圓直言未有特別留意，問可有擔心情況？她說：「都唔太擔心，佢哋自己會Handle，都會問候佢。」