勁賣得！陳柏宇紅館騷門票售罄

歌手陳柏宇（Jason）將於今年12月2及3日首度進軍紅館舉行一連兩場演唱會，唱片公司宣布兩場共25,000張門票全數售罄。對於歌迷們支持，Jason指言語不足以表達其感激之情，當他知道連單丁位都冇剩，除了開心就只有感激、感激和感激！他已開始和工作人員用心度演唱會rundown，以及落力綵排和練歌，亦勤力做gym練氣，務求到時以最佳的狀態作最佳的演出，以報答所有買飛入場支持自己的fans和朋友們。

Jason表示：「真係真係好開心！當我知道賣晒飛時，忍唔住大嗌咗一聲，亦都鬆咗一口氣，不過就嚇親我側邊啲人，哈哈！其實喺我心目中，真係開兩場都已經心足！係大家俾機會我，我會好好珍惜呢個機會，用最好嘅演出嚟報答在場所有嘅觀眾。」

Jason又知道除了自己個唱門票外，亦有其他歌手的演唱會於同日售票，見到有fans在網上商討「撲飛攻略」時，他覺得很有趣，同時又感激樂迷的用心和支持，亦希望其他歌手的個唱門票賣個滿堂紅，樂壇百花齊放。Jason更認為fans們的支持，無論是支持他的與否，其實都很重要，因為這些都是讓歌手努力走下去的動力。

今次Jason的演唱會以「#buildjason」作主題，希望fans及觀眾可以透過網上社交平台，籌集到最多message，當中可以包括祝福、支持、愛意，甚至批評，以證在Jason身後，其實一直有很多人，不單是在香港，也包括來自全世界的fans及樂迷對他的支持，每一字、每一語，將會像Jason所言：「#buildjason呢嚿磚頭係可以興建你喜歡嘅歌手走嘅路，亦可以用嚟攻擊佢，代表住大家嘅一言一語，其實係會影響發展，引領歌手走向一點樣嘅路。」