莊思敏600萬買樓畀莊思明：佢嫌細唔住

藝人莊思敏（Jacquelin）於將軍澳電視城為明晚（2日）的《歡樂滿東華2017》表演環節《東華一家人》綵排。她透露會於節目上玩遊戲及表演兩個短劇：「我參與《歡樂滿東華》都有4、5年，都鍾意嗰個氣氛。打電話嚟捐款嘅人都好多，試過聽電話冇停過手。好多小朋友打電話嚟，佢哋父母教佢哋講。（有冇聽過好大銀碼？）通常好大銀碼嗰啲上嚟交支票。」她又謂有出錢之餘，有考慮過做東華三院的總理，希望短期內可以達成。

層樓攞嚟放租

提到Jacquelin以妹妹莊思明名義，用逾600萬購入西營盤瑧蓺一個二百多呎的開放式單位，Jacquelin笑說：「依家買大單位好難，嗰度好方便，喺港鐵站上蓋，車都唔使揸，唔會驚佢撞車。（畀佢做嫁妝？）畀佢學識吓管理物業。（畀佢同男友楊明同居？）佢唔肯搬去住，話咁細單位唔住。層樓攞嚟放租，佢會畀番啲租金我。」

莊思華都想要

講到莊思明笑言話會遲些出售單位，Jacquelin說：「係呀！佢話如果有一日見佢身光頸靚就知咩事。」至於會否再買樓投資，Jacquelin謂：「莊思華都有叫我買畀佢，但依家暫時未有呢個能力，儲吓錢先，買少兩個袋。」