驚畀人問幾時死！邵音音：咩都話唔嚟

藝人邵音音到觀塘為奇妙電視節目《使乜驚 大兩Gen》錄影，與黃文慧齊跳潮舞，與同場年輕人比毫不遜色，她笑言：「呢啲舞我哋邊識，後生都係跳Cha cha同Tango！（去Party跳？）邊有時間呀，咁多戲拍！」

講到阮兆祥爆料指她親認患皮膚癌，邵音音說：「我冇嬲佢，佢係關心我身體健康，我係有心臟病，依家係多一日算一日。」邵音音又表示事後一直避聽電話：「好驚畀人問我幾時死！佢哋係出於關心，但唔識問，我又唔識答，有啲人問我第幾期，我話更年期呀！每個人都有終點，只係我比較早知，離死亡好近，所以我更會學識珍惜朋友。（朋友介紹醫生？）唔使，我又唔係白癡，大家都出於熱心，但我依家全部電話都唔敢聽，我要安慰番人，搞到好疲勞。」

後生成日喊

講到如何積極抗癌，邵音音說：「冇㗎，我後生時知道後成日喊，會問點解係我有呢個病。（點調整心情？）冇得調整，做人好多嘢都要面對，係人生，更加覺得我都過得好幸福，當死亡陪伴住你，我哋嘅DNA話我哋知死亡有幾恐怖，但死亡之後係點冇人知，死咗就死咗！」

「燒咗咪倒落海囉！」

邵音音又透露將送別早前離世的金牌經理人陳自強：「送佢去大海，佢好鍾意大自然。（自己有冇諗過身後事？）燒咗咪倒落海囉！係懷念我嘅，係我有生之年對我好啲。死亡改變我最多係待人處事，我有唔舒服會自己靜靜哋抖，好怕啲仔女唔畀我拍戲，搞到咩都唔做得，可能係十年後死，或者三日後，咩都話唔嚟！依家佢哋會話媽咪鍾意飲酒瞓，就買酒畀我，鍾意做乜就做乜，放假又陪我。」

邵音音又憶述當年生仔遇到的困難：「當年我去美國生仔，啲醫生咩都驗，驗到我皮膚指數有問題，話咁有機會難產，佢哋控制唔到情況，所以要我簽紙，如果我死同佢哋無關，係我嘅選擇，但我好開心決定生個仔出嚟。」邵音音又展示位於鎖骨的疤痕：「啲皮膚會有黑色、又皺皮、之後會出水，呢度做手術割咗，冇得拎其他皮膚去補，因為少咗塊皮係扯住個頭會歪埋一邊。（點保護皮膚？）唔可以曬太陽、同唔搽化學嘢。」