周柏豪出手作曲　黃淑蔓開心到當聖誕禮物

歌手黃淑蔓（Feanna）年紀輕輕，獲唱片公司寵幸的她歌唱事業一帆風順，不但唱到自己喜歡的情歌，而且新歌《那一年零一個月》更邀請到她的「男神」周柏豪作曲，令Feanna非常驚喜！

日前Feanna在銅鑼灣拍攝MV，提到男神周柏豪替她寫歌，Feanna即時笑到面到紅晒：「唱片公司知道我好鍾意周柏豪，籌備首歌嘅時候，就邀請咗周柏豪幫我寫，好開心呀！喺我今年第一份聖誕禮物，公司就好似係我嘅聖誕老人！」她又稱：「好多謝公司畀我唱我鍾意嘅情歌，好似今次呢首《那一年零一個月》，係講失戀點樣振作，我覺得好多同齡嘅人都試過失戀。」

問及Feanna失戀會怎樣？她表示：「我試過失戀時不停食嘢，食好多好多嘢！總之不停搵嘢畀自己做，又會搵朋友出嚟飲嘢食嘢傾偈、不停唱歌，去自修室讀書同不停做功課。」而在MV裏，要Feanna躺在梳化流眼淚，又抱着公仔跳舞，雖然鏡頭前顯得傷感，但鏡頭後的她常常忍不住笑不斷NG，還被導演喝止。

而年底多個樂壇頒獎禮舉行在即，作為過來人的Feanna就為今年的樂壇新人打氣：「希望你哋繼續加油，堅持唱自己鍾意嘅音樂！」