陳凱琳計劃同嘉穎生B：我會試順產

藝人陳凱琳（Grace）出席品牌活動，提到好友賴慧玲誕下囝囝，Grace表示賴慧玲已出院。身為契媽的她謂有率先抱契仔：「佢哋唔敢抱，所以我抱先，教我托住頸，原來BB好輕，6磅幾。」

鄭嘉穎流露慈父樣

提到男友鄭嘉穎做契爺抱B時露出一副慈父樣，更影了全家福，Grace說：「係呀，佢要坐低先敢抱，咁我交畀佢嗰陣，朋友影咗張相，都好Sweet。（做埋契媽契爺幾時輪到你哋？）一步一步嚟。（嘉穎想唔想要小朋友？）呢個係將來計劃，做住契爺滿足佢先。」提到賴慧玲BB英文名Marat由嘉穎改，Grace說：「係，佢話要Man同Strong ，本身賴慧玲想有M字，諗咗個名，但最後賴慧玲都揀嘉穎嗰個，嘉穎好似中六合彩咁話Yes！」Grace透露會送DIY禮物畀契女，嘉穎就會畀利是。

生仔搏鬥36小時

講到賴慧玲生仔搏鬥36小時，Grace說：「佢穿羊水仲話食埋碗麵先，入院都唔知花甘長時間，佢話個感覺更覺母親偉大。（你會唔會怕咗？）我會試（順產）。」至於Grace比賴慧玲更早Post相，會否怕對方嬲？她直言無問題，事前有問過，決定由她做代表擺相先，因為賴慧玲太忙。