葉凱茵突然開竅　做騷演技功力大躍進

無綫藝人葉凱茵早前獲邀在晚宴上擔任表演嘉賓，傾力演出獲得全場掌聲！原來凱茵當年參選港姐前，曾參加歌唱比賽，並跟「黑妹」李麗霞學唱歌，已有八、九年登台經驗，難怪如此唱得，不過她直言一向在台上都相當緊張，直至今年才突然開竅：「初出茅廬時上台唱歌好緊張，以前同過鄭世豪一班人做騷，永遠係我最騰雞，又同觀眾冇咩互動，但近一年唔知點解開咗竅，識得搞氣氛，都多咗人讚，呢樣係我覺得今年進步好大嘅地方，另外自己拍攝方面都有進步，唔止係死記對白，係會努力創造角色，例如最近拍《是咁的，法官閣下》，都放咗好多諗法入去。」

年頭凱茵更跟喬寶寶到美國登台，三日內來回飛西雅圖又飛返香港，最終順利完成多場演出：「之前試過去加拿大、英國登台，但美國就第一次，其實之前都有機會去，但因為佗BB而錯失咗，所以今次登台係份外難忘。」凱茵直言自己喜歡唱歌更多於拍戲，希望之後有更多現場獻唱機會。