最萌身高差！側田企木箱自嘲矮過陳慧琳

歌手側田在紅館舉行尾場演唱會，獲女友及媽媽、陳柏宇夫婦、小肥、張建聲及女友陳嘉莉、崔建邦、林奕匡夫婦、何雁詩、連詩雅、李幸倪等人到場支持，其中陳嘉莉的舊愛崔建邦與新歡張建聲同場，但因坐不同位置，故崔建邦與陳嘉莉同場不相見。側田如第一場一樣，繼續與12個女舞蹈員跳唱一連串快歌，如《紅地毯》、《爽》，期間舞蹈員不時與側田有身體接觸。跳唱完一輪快歌後，側田索晒氣，休息時更一度除帽抹汗，露出光頭。

Encore環節時，側田唱出一連串快歌medley，唱到《大日子》，舞蹈員搬出一個木箱畀側田企上去，接着嘉賓陳慧琳（Kelly）出場合唱，側田即笑言：「我終於高過你啦！」之後側田行番落嚟，Kelly講笑叫他企番上去個箱，側田多謝Kelly來做嘉賓，Kelly笑言啲仔已經瞓晒覺，之後兩人拍埋一起企，但身高差異太大，「一高一矮」令觀眾忍不住笑。Kelly又讚側田厲害，在11年內開了7個紅館演唱會，側田即謙稱要catch up Kelly，她又謂每次見到側田都有陣味：「由頭到腳係有一陣味，係一陣音樂味，好有吸引力，唔係個個人都有，所以樂壇好需要你。」側田又謂send了幾首歌畀Kelly揀來用，接着兩人合唱《失憶周末》，全場High爆，唱完後Kelly問大家：「你哋想唱到幾點？但我要返去啦，我聽朝要湊仔。」之後就離開舞台。

唱完《情歌》後，觀眾大叫Encore，側田再走出來，笑言：「罰錢㗎喎，每人出門口擺低十蚊。」之後他唱出《頭條新聞》及《咖啡因萬歲》，最後以《美麗之最》作結個唱，演唱會於11時半結束。

----------------------------

東網巨星開咗ig喇，大家快啲follow啦！

https://goo.gl/KGuo2N