張敬軒自認係沙田麥偉利＋西營盤彭于晏

歌手張敬軒為沙田馬場舉辦的「浪琴表香港國際賽事」擔任表演嘉賓，並獻唱三首歌曲。軒仔表示今次是事隔十年再到馬場表演，亦是第一次為浪琴錶表演，深感榮幸。軒仔坦言間中也會托朋友幫他買馬，他說：「因為佢哋好叻，係專家。（你有冇運？）我有㗎，我唔係搭沉船嗰啲，我係好腳頭，但唔係成日有斬獲，其實賽馬係好好嘅運動，贏咗可以賺錢，又可怡情，就算輸咗都可以幫到人，馬會都經常支持慈善機構。我以往喺看台睇馬，今次喺馬匹亮相圈表演，覺得自己好似馬匹。（有冇諗過做馬主？）我希望有咁嘅一天，我嘅願望好簡單，可以拉到頭馬就好開心，但仲未有機會。我自己有學過策騎，但當然同騎師冇得比。我之前同有個南非騎師麥偉利撞樣，我係沙田麥偉利。」

「會叫佢唔好扮我」

而同場還有台灣型男彭于晏，軒仔笑稱自己是西營盤彭于晏，他說：「我見過彭于晏真人，但隔好遠，我會叫佢唔好扮我，我啲女仔朋友知道我今日同彭于晏同場，問可唔可以扮係我助手入場同佢合照。（覺得佢係男神？）佢當然係，佢集所有男人願望於一身。」

畀霆鋒叫傻瓜

另外，講到早前謝霆鋒摩打手唧朱古力，軒仔模仿對方以摩打手烚肥牛拍片，又將兩個生麵王放在肩上扮霆鋒衫上的流蘇，片段爆笑，軒仔笑言：「我出到街個個叫我生麵王，又問我膊頭嘅麵喺邊，帶挈到我件衫好多人想買。霆鋒睇過段片好滿意，佢睇完畀咗好多手指公我，佢好玩得。當日我同鍾舒漫、林欣彤一齊上遊輪表演，之後大家上甲板打邊爐。我睇過霆鋒段片，佢件衫嘅流蘇最吸引我，本來諗住放烏冬上膊頭，但又太粗，點知又有生麵就啱晒。拍條片好開心，冇惡意，我都有第一時間同霆鋒備案，我話怕佢嬲，佢好冧咁話：『點會呀，傻瓜！』（佢下次又惡搞你？）我要諗定個招牌動作先。」軒仔又指今日霆鋒上了挪威報章的頭版，非常犀利，為港人爭光。