投資七位數搞時裝　王君馨唔會放棄演戲

藝人王君馨與時裝設計師Marco Chan推出首個時裝品牌舉行發布會。王君馨表示今次投資七位數字，籌備了八個月的時間。問到有冇一齊參與設計？她說：「都有，Marco設計完我哋會加入意見修改，但係首飾同時裝嘅設計好唔同，首飾唔使諗size，最緊要容易襯，但時裝就要顧及唔同人嘅size，所以我哋改咗三次先至可以完成。（會唔會叫好姊妹幫手宣傳？）會贊助佢哋，之前都有畀咗啲衫嘅樣佢哋睇，但宣傳就太貴啦，搵一個做，其他可能唔開心，但搵四五個一齊做，條數真係要諗諗。（會唔會開舖頭？）依家都有同幾個大型嘅商場傾緊。（會唔會仲想做其他類型？）做埋鞋就真係完成，成身都係自己做嘅。」問到會否因為做生意而減少幕前演出？她說：「唔會因為生意，而放棄演藝嘅事業，覺得拍戲，生意開咗個頭，之後可以交畀其他人打理 。」

聖誕留港開party

至於聖誕節，她表示是婚後的首個聖誕節，會留在香港，到時會與教友一齊舉行聖誕派對，說：「會親自整嘢，想整啲特別啲嘅，但太耐無落廚，所以都要花啲心思，我同老公都好鍾意整嘢食。」

----------------------------

東網巨星開咗ig喇，大家快啲follow啦！