已諗定追多個　李漫芬開心宣布佗B女

藝人李漫芬（Fanny）到銅鑼灣為食店擔任開幕司儀，老公談成坤（Alvin）亦有到場。已懷孕26周、預產期在明年3月底的Fanny，開心宣布佗B女，問是否已為B女改名？她說：「老公未識我前已經諗過生女改咩名，諗住叫『凱嵐』，不過我都諗咗個叫『在心』，想佢用心待人，會二選一。（邊個贏面大啲？）應該『在心』贏面大啲，『凱嵐』筆劃太多，畀老師罰抄就慘！英文名冇乜頭緒，應該會畀個女自己改。」Alvin則說：「好似話呢個時期BB對聲音同光已經有反應，依家出門口前都會錫佢個肚，同佢講嗲哋出門口啦！搞到依家喺屋企都唔敢亂諗嘢。」

Fanny又指佗B後工作變多，笑言囡囡旺她：「3月底預產，但工作都預到3月頭，啲人搵我話大肚婆旺，一份錢兩個人、三個人到，抵喎！（加價？）唔會，好多都係合作好耐嘅朋友。」Fanny又表示已預約醫院，直言恨自然分娩但又怕痛，而Alvin則表示想入產房剪臍帶，但擔心唔識剪可能要交由醫生代勞，在旁邊學剪，下一胎再剪過，放定聲氣恨追多個B。