樂極生悲!王馨平跌落海受傷坐輪椅
20171218
東網電視
更多新聞短片
![](/hk/bkn/cnt/entertainment/20171218/photo/bkn-20171218143112034-1218_00862_001_01p.jpg?20171219052535)
王馨平喺社交網上載咗張坐喺輪椅嘅相,原來佢準備返嚟香港時出事呀!
藝人王馨平(Linda)不時都會喺社交網站分享生活點滴,而今日佢就上載咗一張坐咗喺輪椅嘅相,仲留言:「只需一秒的時間,意外就會發生!」身穿粉紅色上衣嘅Linda面帶苦笑咁坐住輪椅,明顯見到佢嘅左腳小腿貼咗塊膠布,而且仲滲有血迹。唔少網民都追問Linda嘅傷勢,仲叫佢要好好保重添!
上船時叉錯腳跌落海
同老公去咗馬爾代夫度假嘅Linda已返港,佢接受東網訪問時,原來係跌落海受傷,佢哈哈大笑自嘲:「Too Stupid!我都覺得自己點解咁Stupid嘅?但諗番成件事,其實我都好小心,呢啲真係意外囉,我哋去馬爾代夫玩,尋晚準備上嗰隻遊艇,因為個遊艇接送去機場嘅,但尋晚馬爾代夫就好大雨,天氣又好差,又夜晚啦,其實我都去過幾次,都係坐遊艇出入機場,但尋晚唔知點解,其實我右腳踏咗上船,啲人都有扶住我,我諗我左腳叉錯腳,一踏落去唔係任何平地嘅地方,一下就跌咗落(海)去,啲人都拉都拉唔到我囉。」
淡定游返上水面
問到老公為何冇好好扶住佢時,Linda為老公講好話:「我哋係一個一個上船嘅,我老公跟住我後面,係我上船先,嗰度啲人一個一個拉住我哋上船,我一落水,所有人都手忙腳亂,不過我自己識游水,我開頭準備浮上岸嘅時間,我感覺到個頭頂係撞到個船底,所以我再游開啲再游返去水面囉,咁我覺得諗番成件事,最危險係個頭撞到,係浮上水面嗰下比較易出事,嗰時又黑麻麻,如果好慌張嘅話,一撞到個頭都可以好大件事嘅,我都覺得好好彩,我頭頂掂一掂,知唔可以浮上水要再游出啲,成件係意外,啲人話明明見我上咗船,下一秒鐘就跌咗落海,唔知應該點算…哈,所以呢啲係意外,左腳撞損咗,依家瘀晒、腫晒,同埋有擦破啲皮,所以有流血,個頭冇事,酒店醫生立即幫我第一時間搽咗啲藥,膠布呀,我11點鐘先返到香港,因為飛機大delay,剛剛我仲教咗堂瑜伽,因為今日12點鐘係有一堂瑜伽要教,所以唔可以失場,如果我唔去就全班人等我,搵唔到老師頂,我坐機鐵去上堂,依家先返到屋企。」
沉咗落海底
問身邊可有其他地方感痛楚?佢就話:「冇乜痛,只係左腳痛,成個人撻咗落去,成個人沉咗落海底,我只係記得:『吓,點解我喺水裏面嘅?咁樣,哈…』,都唔知點樣發生成件事,所以咪叫意外囉,我都覺得好好笑。不過成個人跌咗落海,成個人濕晒,落湯雞咁,要返酒店再沖涼換衫再去機場。」
行得跑得冇大礙
問到腳不斷滲血似乎傷得好重?佢叫大家勿緊張:「冇呀,我頭先郁動過,啲血先滲出嚟啫,我冇事㗎,真係,我一陣換一換膠布,其實係表面擦傷,我行得、跑得,不過航空公司大陣仗之嘛,我又覺得有輪椅咪坐吓囉,哈哈。(可會claim保險?)我未同老公商量,佢都立即返工,佢依家喺office,佢都叫我快啲去醫院睇醫生,不過我哋係有買保險,如果我一陣去睇醫生都claim到。(照吓個頭好喎?)OK!」
----------------------------
東網巨星開咗ig喇,大家快啲follow啦!