林作都「#metoo」　自爆有抑鬱症

韓國男團SHINee嘅27歲主音鐘鉉因抑鬱症自殺身亡，事件引起各界關注，唔少藝人都紛紛企出嚟呼籲大家要正視抑鬱症呢個問題。而前大律師林作今日亦喺社交網站發文，話要企出嚟講「#metoo」，分享自己曾患抑鬱症。

林作喺文中提到自己13歲時曾因為學習上嘅壓力，因而患上抑鬱症，更加一度搞到要停學。不過林作嗰陣並冇去睇醫生，只係喺去咗英國之後，情況慢慢好轉。可惜林作返嚟香港之後，抑鬱症又再病發，仲開始拒絕社交！好彩林作得到朋友介紹，有去睇心理醫生做治療，再靠自己嘅意志克服呢個病，最後林作都用過來人鼓勵大家要搵到自己人生嘅美好！

長文如下：

我又想睇下（吓），如果係呢件事上我也站出來 #metoo, 會否有人同情我。

睇到有韓國天團成員自殺嘅新聞，確實我第一個反應係：我唔認識佢。其實到今日，我都唔留意娛樂新聞，更何況係韓國嘅。不過我見到佢嘅死令到抑鬱症似乎真係喺香港受到重視。佢嘅離世甚至乎令到好多「突然」學會有憂鬱症嘅人唔應該被歧視，也都唔應該有咁多誤解。就係一種疾病。13歲嘅時候我係因為抑鬱停學。因為我頂唔順填鴨式教育嘅壓力。我並冇睇過醫生，但係我知道全家人都知。一年後我被送去英國。每次睇返（番）我嗰段時期嘅相，我都係冇任何笑容。世界對我來講完全係黑白嘅。所有嘢都冇意義。而我亦都因為嗰時對學校產生恐懼，從來唔願意談及自己讀書嘅學校，甚至乎即使去咗英國，讀過嘅學校喺畢業後都唔夠膽返去探訪。認真，我對學校有陰影。我個人思想好傳統，抑鬱症確實喺我細個成長嘅時候並不是一個十分被認可嘅病。我接受嘅教育話俾（畀）我聽抑鬱係一啲弱者、無能嘅人、太多時間諗嘢嘅人、做不正當嘢嘅人先至會出現嘅問題。確實，我去咗英國之後自己嘅性格變得開朗，學識咗社交，呢個問題其實有幾年都冇困擾過我。當時個女朋友甚至乎同我講佢從來都冇見過我唔開心嘅情況。

但我返咗香港幾年之後，情況又再出現。

今年下半年，我開始拒絕好多嘅社交約會，而朋友們有好多都有comment話我望落好頹，好累，好sad。It's true. I don't hide. 今次我係有睇醫生。多得一位我摯愛嘅女仔介紹，我係有睇精神科醫生及心理輔導員。心理輔導員姐姐同時係個明星，令我睇到好多自己嘅問題。兩位睇咗一段時間後其實就已經冇再睇，因為我發覺，真係要靠自己。藥物我冇食過，但我自己有好朋友多年飽受困擾，而我認為藥物對佢嘅影響甚至乎大過本身病情。

自己大學副修哲學，對人生意義嘅問題有落過苦功。印象中有本叫 "The Meaning of Philosophy"嘅書，裏邊有探討人生意義嘅一章。裡（裏）面講到，人生意義並唔係靠理智（reason)可以獲得。如果自己失去人生意義，用理由係搵唔番嘅。 所以我覺得只可以靠意志 (will)。意志並唔係靠食藥可以得返（番）。出邊嘅人一直都覺得我係個超級快樂嘅人，娛樂性高，開派對請我去最啱，一定令到氣氛火爆，但其實我係個十分極端嘅人。喺派對會好激動，但除此以外沉寂到爆。 追女仔嘅時候呢，女仔好難睇到，一齊咗之後就發覺我成日都愁眉苦臉，其實會造成好大嘅傷害，亦都往往係最後分開嘅原因。我亦知道天生樂觀嘅媽媽其實都非常害怕面對我，因為我總會令佢心情蒙上一層陰影。前女友們並不是拋棄我離去，而係我為佢造成極大心理壓力，佢哋自己都處理唔到。

都係果（嗰）句，其實係要靠自己。Will。

好似美國影星Robin Williams, 外面快樂，內裏掙扎最後自殺，我覺得我都有呢種comedian嘅格，但我相信自己唔會咁，因為我依然見到人生嘅美好。近年轉向幕前更加令我發現好多表面膚淺、以前我會不屑一顧嘅嘢，其實可能就係人生樂趣所在。 Maybe life is meaningless. But so what? If so, the fact that life is meaningless does not matter either. 共勉之。