盧巧音靠跑步抗抑鬱：做創作情緒易波動

歌手盧巧音（Candy）於麥花臣場館為一連兩場的演唱會舉行尾場，全場爆滿。Candy於演唱會中途換上紅色斜肩Jumpsuit，唱出《吶喊》同《暖色》，仲拎住結他自彈自唱，亦有唱出兩首英文歌，分別係《All Apologies》同《Million Reasons》。去到Encore部分，Candy唱出林曉培嘅《煩》，再獻唱《800伴》，為演唱會畫上圓滿句號。

接受訪問時，Candy表示開兩場演唱會唔夠喉，但因為場地檔期問題而未能加場，希望明年再開騷。問到點解唔請老公Sammy上台做嘉賓，Candy笑言因為老公18號才回港：「原本都有安排佢上台嘅，但係冇時間練，所以安排咗佢賣嘢（紀念品）。（喺台上冇多謝佢？）佢話唔使。」至於談到喺台上講到跑步變成人生嘅checkpoint，曾受情緒困擾嘅Candy直言跑步幫助到意志及堅持嘅精神，問到老公會否幫助紓緩情緒？她說：「跑步好個人，我哋都有一齊跑，不過我多啲時間跑。」不過就笑言呢兩日都唔會跑步，要休息一下。

另外，提到頭場嘉賓邀請到周國賢，Candy坦言很感激對方做完嘉賓就立即要趕飛機離港，講到係咪都會選擇邀請遇過低潮嘅朋友做嘉賓，Candy指從事創作嘅人情緒比較容易波動。問到她現時情緒上係咪冇再受影響，她直言：「自己OK晒，冇嘢㗎啦，做運動好好多，開心啲，跑步唔會胡思亂想。」