拿督女身份累事！莊思敏成日被人攞着數

由藝人夏雨、李司棋、米雪、關菊英等孭飛的無綫劇集《溏心風暴3》，播出以來的內地網上點擊率億億聲，成績絕對不俗。而劇中演富家女的莊思敏，亦與眾前輩不乏對手戲，日前她接受東網訪問，表示角色根本看不起背景比她低的人，故經常藐嘴藐舌示人，為免令前輩們誤會，所以埋位前也有預先跟眾人備案。

藐人藐上癮

雖然未有被前輩們責怪，但莊思敏透露完成幾個月拍攝後，基於太入戲關係，結果把角色帶入現實生活中，她謂：「間中都會拎出嚟用，對阿妹有，多數用嚟對朋友，自己唔覺，係有朋友留意到我做乜成日藐人（觀眾反應？）都好好，有少數人會憎我，但睇留言都知係憎我嘅角色啫！」談到戲裏戲外均是有錢女，問到現實中可有遇過黐飲黐食的朋友？莊思敏謂：「讀書時有個同學成日話唔記得帶銀包，唔知點解，食親嘢會話多除少補，但永遠除漏自己，你問佢食唔食薯片，佢話唔食，之後買返嚟係佢食晒，後來有一次食飯，朋友好奇問張單幾錢，先發現原來佢又冇除自己嗰份，呢個人梗係慢慢疏遠，依家唔係朋友啦！」

身份累事失工作

被同學攞着數不特止，沒料踏入社會工作後，亦曾因擁有拿督女身份被人標籤，莊思敏謂：「試過某啲工作嘅中介人，知道我身份後，同唔知嘅時候對我可以有兩種態度，好多機會無啦啦流失，佢哋會覺得我唔憂做，咁就唔好同人爭啦！唉！冇計，咪慢慢用工作態度令佢哋改觀番，係會唔開心，都持續咗一年左右，但我就冇計損失咗幾多個工作（阿妹莊思明有冇呢個遭遇？）又冇，佢港姐出身，無綫大把有背景同有錢嘅人啦！」更指兩姊妹有如來自兩個家庭，有朋友亦戲言她有如此家庭背景才找不到男友，她謂：「咁我兩個妹又有男友嘅，點先？都唔關事，明明佢哋同我差唔多高，都搵到男友啦！（唔想要拿督女身份？）唔可以抹殺家人成就，反而同自己講要成功過爸爸（壓力？）又唔會，係推動力。」

場地：點心代表

服裝：Tela

----------------------------

東網巨星開咗ig喇，大家快啲follow啦！

https://goo.gl/KGuo2N