視帝視后爭崩頭!陳志雲秘揭無綫內鬥

20171222
東網電視
更多新聞短片
原來台慶頒獎禮條橋係陳志雲諗!

陳志雲為OTT平台OpenSky.tv主持節目《大開眼界》推介節目,還披露18年來在無綫的秘聞。無綫每年的盛事《萬千星輝頒獎典禮》下月將舉行,陳志雲可謂無綫台慶頒獎禮之父,他說:「我記得係我提出,建議可唔可以做頒獎禮,當時做緊節目部總監,當然唔同部門都有意見,獎畀得呢個,驚有啲同事唔開心,最後落實製作部去做。初時大家好開心,做頒獎禮某程度可以懶啲,因為頒獎禮喺台慶裏面,咁其他嘢就唔使點度,後來方小姐(方逸華)話唔得,叫分開嚟做,一直到今日。」

睇好馬國明攞視帝

今年視帝以王浩信及馬國明呼聲最高,再三要求下,「台慶頒獎禮之父」陳志雲於「不公平」下揀了馬國明,他笑說:「冇睇好邊個,因為兩套都冇睇,王浩信唔係好認識,馬國明我就認識多啲,憑對佢認識,當然希望馬國明攞,但唔代表王浩信唔好。馬國明係非常好嘅人,好謙虛,冇乜野心,有得做就開心嘅演員,係一個天真爛漫嘅鄰家男孩。」

檔期有人歡喜有人愁

台慶頒獎禮出現,令到編排劇集檔期出現爭崩頭,因為劇集愈近頒獎禮自然愈有利攞獎,陳志雲笑說:「節目部就做咗磨心,大家去角力,記得最犀利係排《天與地》喺十二月,因為唔係台慶劇,製作部唔係咁高興。有角力係好嘅,製作最大吸引力就係冇一定得嘅方程式,好似《金枝慾孽》知佢得,但估唔到得成咁,後來有啲老闆就話要一年開四套呢啲。」

「講唔掂搵高層定奪」

劇集爭檔期爭崩頭,那麼視帝、視后豈不是更激烈,陳志雲直言他的年代沒有傳聞所說的簽約換獎這回事,他說:「你睇番以前攞過視帝、視后都唔一定係TVB經理人合約。當時制度觀眾投票佔一定比數,內部評審係佔好重要嘅元素,內部評審嘅票係會影響到結果,但係當時內部係好公開、透明咁討論,內部自己角力係會爭崩頭,係會講到反面、面紅耳赤,呢啲真係有嘅,講唔掂咪搵高層去定奪。」陳志雲又指當時沒有藝員向他埋堆爭取獎項,但他相信會向監製層面爭取,他亦覺得並不是壞事。

落餐廳揀蟀

當年無綫率先興起舉辦香港先生的概念,但卻被亞視截胡,他說:「以前搵小生好難,方小姐就叫我哋出去見多啲人推介畀公司,要同事每月要交人,但後來冇嚴厲執行。自己試過去一間餐廳,有啲服務員質素唔錯,同佢傾偈了解吓,問佢哋有有興趣嚟試鏡,結果畀餐廳趕走,陳生我哋唔歡迎你,梗係啦你撬人啲員工。」可會尷尬擔心被誤以為是hehe﹖他說:「唔會尷尬,都係做嘢,覺得佢有潛質先傾,但我就未成功過咁樣搵人入TVB。」

唔敢同陳啟泰比

見慣風浪的陳志雲對主持亞視的《百萬富翁2018》坦言有壓力,認為與陳啟泰難作比較,他笑說:「我唔會嚴肅,會輕鬆啲,喺輕鬆吓製造緊張,亦都會滲透《志雲飯局》嘅元素入去,觀眾都有好多故事。」電視圈再起風雲,陳志雲坦言看不到有人可以打低無綫,他說:「TVB根基好雄厚,唔覺得有人可以打低TVB,除非佢自己做咗啲好錯嘅嘢,自己打殘自己,因為TVB觀眾底好強,依家最多人睇都係TVB,但優勢會因為科技、新媒體興起減低。」

場地:皇子酒店
髮型:i HAIR@Base Luk

----------------------------
東網巨星開咗ig喇,大家快啲follow啦!
https://goo.gl/KGuo2N