新城:新城高層回應環球星夢杯葛頒奬禮

20171230
東網電視
更多新聞短片
程凱欣否認有關傳聞。
新城知訊台節目執行總監程凱欣出席《新城勁爆頒奬禮》慶功宴,講到環球及星夢因不滿獎項安排,故旗下歌手缺席頒奬禮,她表示沒有聽過此事:「頒獎禮前一直有同佢哋保持緊密嘅聯繫,一路有傾住佢哋啲歌手嘅推廣宣傳,唔知道有呢個講法。我哋同所有唱片公司都保持住緊密嘅聯繫,都有邀請佢哋出席。(佢哋點回覆?)佢哋會考慮。(但佢哋冇出席到,會唔會真係嬲?)我同兩間唱片公司嘅人一路有聯繫,如果佢哋嬲都應該唔會同我有Contact,我又唔覺得佢哋會嬲。(但佢哋唔出席,會唔會行動已經表達咗?)我知道有唱片公司嘅Artist本身有開緊演唱會,或者個別撞期特別原因,你哋要問番佢哋點解唔出席,我哋成日同唱片公司保持緊密聯繫,歡迎佢哋參與。」
講到周柏豪受訪時表示公司幾日前已經知道公司其他歌手不會出席頒獎典禮,她謂:「即係講星夢?我都有同Herman(星夢老闆何哲圖)保持聯繫,佢都有同我講周柏豪會出席,另外歌手我唔清楚。(Herman當時有冇同你講佢唔會出席,因為佢都冇嚟攞奬? )佢冇講過佢會嚟或者唔嚟,佢淨係話會考慮。(會了解番件事?)我諗可能係公司特別原因,佢哋冇出席啫,至於聯繫其實我哋個個禮拜都有傾偈。(唔覺得有唔開心成份?)冇冇冇,同埋可以睇返,無論邊一間唱片公司嘅歌都繼續喺我哋個榜度,如果大家有唔開心嘅關係,冇理由啲歌仲會繼續係我哋個榜出現。」