名人：何超蓮新西蘭帶蕉入境被扣留罰錢

賭王三房千金何超蓮出席護膚活動，她早前與丁子高、DJ少爺占及Donald遠赴新西蘭拍攝極限真人騷，超蓮透露期間發生小插曲，在新西蘭過關時被扣留，她解釋：「當地好嚴格，唔畀帶生果進口，我個工人姐姐唔知，佢怕我肚餓，將五隻蕉放咗我個行李度，所以過唔到關，最後罰咗幾百蚊紐元，我事後冇同工人姐姐講番，佢都係好心。」

舅母併發症離世

另外，超蓮表示剛由台灣落機，此行為工作及散心。提到早前其舅母過身，問到心情是否已平伏？她說：「平伏咗，佢本身有肺癌，但離世唔關腫瘤事，係因為併發症，佢今年82歲，事發都覺得好突發。（佢係咪好錫你？）係，佢住喺我屋企，大家關係好親近，佢由細睇到我大，佢塊面有粒癦，我塊面又有，我講笑話因為佢成日錫我，所以粒癦黐咗落我塊面嗰度。（媽咪心情點？）佢心情ok，我諗因為我仲細，好少呢啲經歷，所以難過啲，媽咪佢ok，佢要睇住我舅父。」

猷啟帶過好多朋友返屋企

此外，日前超蓮胞弟猷啟在社交平台放閃，大晒與女友的照片，超蓮坦言也有看到該照片，問她有否見過真人？她說：「見過，佢好多朋友我都見過。（佢女友係內地模特兒？）我冇問。（幾時到你拍拖？）我冇心情。（細佬好識揀女友？）佢都靚仔，所以會吸引到靚女，好正常。（媽咪見過猷啟女友未？）好少會咁見家長，我媽咪係好開通嘅家長，而且我細佬都帶好多朋友返屋企，佢係其中一個都唔定。（細佬有冇表現到好sweet？）正常咁囉！」

----------------------------

東網巨星開咗ig喇，大家快啲follow啦！

https://goo.gl/KGuo2N

東網已全面支援360影片及相片，讓你全方位睇盡新聞大事，恍如置身現場，立即登入東網360網頁： http://on.cc/360/

如仍未更新東網App，請按此連結收睇360影片： https://goo.gl/F9pXJe