《3日2夜》女神集合！網民激讚仙氣滿瀉
20180105
東網電視
更多新聞短片
真係好有仙氣呀！
無綫節目《3日2夜》一向盛產靚女，仲成就咗唔少女神同咪神，一班女星憑住靚人加靚景成為觀眾熱烈討論嘅話題！而藝人鄺潔楹（Judy）、鄧以婷（Irina）、陳詩欣及伍樂怡（Kelly）呢四位靚女就不停喺IG甫靚相，長腿玉背乜都有，佢哋仲透露喺星夢郵輪「世界夢號」上拍新一集嘅《3日2夜》，真係令節目「未出街，先興奮」！
而呢次佢哋就為「1月生日之星」慶祝，見佢哋預備咗一個蛋糕齊齊慶祝，最特別係個蛋糕上面仲插住咗彭于晏嘅紙牌公仔，睇嚟係為咗佢哋嘅喜好而準備，其中新咪神鄧以婷仲興奮到拎住個紙牌公仔嘟晒嘴咁！而有張合照見到佢哋四個頭貼頭咁，相信感情已經相當好！有網民就留言話佢哋仙氣滿瀉，四個都咁靚女！
鍾意彭于晏
Irina接受東網訪問，大讚郵輪多嘢玩又靚，過程難忘！講到其中一張相是與彭于晏公仔蛋糕合照，Irina表示是一位撰稿員的生日，自己及Kelly亦在一月生日，獲其他人送上驚喜祝賀超級開心：「好驚喜呀！多謝大家！（你好鍾意彭于晏？）都幾鍾意佢！有型又得意！（仲有咩難忘事？）其實拍完最後一個Shot之後，我有少少唔舒服，食咗粒藥返房瞓，我錯過咗佢哋火鍋慶功部分，好在趕得切起身，趕到之後嘅Buffet咋！」
買蛋糕險穿煲
原來生日蛋糕是由Judy負責，她直言買蛋糕時被Irina撞破險些穿煲：「我拎完蛋糕就撞正鄧以婷，佢見到我就問我咩嚟，我反應唔切，仲亂答食宵夜，都唔識點答，反而係佢幫我兜問我係咪買外賣？到第二日我同佢哋慶祝有講番，都覺得好好笑，好似電視劇情節！（點解蛋糕有彭于晏肖像？）因為個Writer好中意彭于晏，咁相信好多女仔都鍾意啦！」
對於被讚是仙氣女神？Irina笑言要多謝另外三美帶挈：「我係第一次畀人咁稱呼，第一次仲聽錯做有『屍氣』，哈哈！好開心，要多謝另外三位仙氣女神！」至於多次獲網友讚賞的Judy笑說：「今次觀眾會見到我另外一面，冇咩仙氣，我會幾嘈同窒人，效果應該幾好笑！」
---------------------------
東網巨星開咗ig喇，大家快啲follow啦！