譚俊彥接棒做包青天　老竇狄龍過兩招

藝員譚俊彥在將軍澳電視城為重頭劇《包青天再起風雲》開工。飾演包青天的譚俊彥最近日以繼夜開工，面上難免有點疲倦，在化妝間亦唸唸有詞背熟對白，他說：「今次開工時間都幾長，對白亦都好多，仲要每日用個半鐘時間去化妝，所以都好耐冇陪個女，好多時朝早五、六點收工，佢哋都瞓緊覺。特別好多謝蝦頭（楊思敏），戲中同佢有感情線，可能佢係舞台劇出身，所以啲能量好爆，有佢喺度就算好攰都會精神一振。」

譚俊彥指《包青天再起風雲》會有新風格，有點似福爾摩斯查案形式，問到父親狄龍（曾演包青天）有沒有給他意見？譚俊彥笑說：「佢睇到我張海報嘅造型，話我好惡，叫我唔好咁惡，我話都係似你啫。最搞笑老竇攞咗我張海報簽咗自己個名送畀家庭醫生，醫生都講笑話係咪應該你個仔簽名先啱。」