入行30年終圓紅館夢　趙學而搏老命性感

歌手趙學而明年入行30周年，今年終於一圓紅館個唱夢，將於4月28日舉行《趙學而 Right On Time 個人演唱會》。早前學而就為演唱會拍攝海報，全程都是真空上陣，她笑言自從當了人妻之後，從來未試過咁大膽，西裝褸內真空坦蕩蕩，所以拍攝過程她最緊要都是叫大家幫手睇住不要走光。

增肥日食七餐

入行30年才首踏紅館，演唱會名《Right On Time》是她跟團隊一起想出來，她說：「既然個個朋友都同我講，你係時候去紅館，大家咁用力推我上去，咁『Right On Time』咪好配合囉。」等了30年，學而笑言她已經為演唱會開了萬次會，又說：「咁難得紅館喎！雖然我一把年紀但都會搏命盡力啦！我諗住到時跳火圈吞火劍，超級無敵十字步呀咁都會做！哈哈哈！跳勁舞呢啲就到時大家入場睇吓有冇！服裝方面都研究緊，老公唔會理我控制我啦，一人做事一人當，我自己決定就得。我依家最大難題係太瘦，一定要好努力增肥。為咗增肥，我已經日食六、七餐，除咗瞓覺，無時無刻我都喺度食嘢咁滯，希望到時大家唔單只睇到我呢個小骨女一個『骨騷』啦！」

研究加場

講到去年九展演唱會，兩場門票秒殺，今次去紅館但只開一場，問到學而為何只開一場？她就說：「睇觀眾反應啦，如果反應好好，就同大會研究吓，係咪可以加，依家真係唔敢咁貪心，可以唱一場已經好開心。」至於演唱會嘉賓，學而就謂當然想找好多朋友來一齊玩一齊開心，不過又擔心麻煩到朋友，所以現時還未有決定方案。總之圈中好友們，想舒舒服服坐觀眾席捧場，或者主動上台一齊玩，她都無任歡迎。

----------------------------

東網巨星開咗ig喇，大家快啲follow啦！

　https://goo.gl/KGuo2N