《韓薦》：朴時厚孖申惠善拍長劇博翻身

又到新一期《韓薦》！今期為大家介紹由去年一直播到今年嘅50集韓劇《我的黃金光輝人生》，曾經捲入性侵案嘅男星朴時厚憑呢套劇成功翻身，而首度擔正女主角嘅申惠善亦都憑呢套劇上位。今集仲會同大家講吓朴仁煥、申久、林玄植同尹德鏞主演嘅新片《Be-Bop-A-Lula》，係講述四個伯伯一齊達成遺願嘅故事，內容大晒溫情又充滿正能量。

而劉在石主持嘅人氣綜藝節目《Happy Together 3》之前受KBS電視台嘅工潮影響，停播咗一段日子，終於喺上周復播，請嚟歌謠界猛人Gummy、Ailee同臉紅的思春期做嘉賓。今集《韓薦》仲會同大家介紹吓另一個綜藝節目《逃出巢穴》第二季，係《Produce 101》第二季出身嘅15歲「雞仔練習生」柳善皓同另外三個差唔多年齡嘅星二代一齊孭住背囊去希臘探險嘅故事！

此外，今期節目亦都會同大家推介IU翻唱韓國一代歌王金光石經典歌曲《抱着要忘記的心》嘅MV，擔任MV男主角嘅朴正民仲會同IU上演一段悲傷嘅愛情故事，咁豐富嘅內容千祈唔好錯過啦！