ViuTV選美出身的湯沛宜（ToTo）日前出席玩具展活動，她表示剛加盟李霖恩旗下的經理人公司，將會參與公司投資的音樂劇，故近日積極開聲備戰：「我都係第一次參加大型嘅音樂表演，平時只限唱K玩吓，我唔識用丹田唱歌，成日用錯喉嚨發聲，所以之後我會搵歌唱老師上堂，惡補歌藝。」另外，她透露即將參加ViuTV的電競真人騷，與其他藝人齊齊受訓做「電競女神」，打機經驗不算太多的她表示：「知道電視台將會安排我哋上堂學打機，原來打機唔只係坐喺度玩咁簡單，仲要做運動，令筋骨靈活啲，真係大開眼界！」講到她有份在陳蕊蕊的美人魚學校教游水，她笑言現在天氣寒冷，正處於「休魚期」，但下月底將會跟隨「美人魚大隊」到台灣最新潛水池「潛立方」受訓：「雖然二月天氣都仲係好凍，但聽講台灣個泳池有室內恆溫，水溫有成攝氏30度，所以我哋都放心晒。」