相隔9年再合作 黃子華當佘詩曼係心靈雞湯

20180123
東網電視
更多新聞短片
黃子華與阿佘相隔9年再度合作。

男神黃子華與佘詩曼(阿佘)近日於大銀幕「再續前續」,二人今次合拍賀歲片《棟篤特工》向觀眾大放笑彈。日前子華與阿佘齊齊「出海」宣傳《棟》片,原來該片是二人自電視劇《絕代商驕》相隔9年再度合作,甫見面更不忘互笠高帽,子華大讚阿佘由當初電視台姐仔變成有巨星feel,直指阿佘曾是他的「心靈雞湯」﹕「好記得當年拍電視劇唔夠瞓,我成日黑口黑面,見到阿佘笑晒咁返工,真係好大嘅動力。」阿佘即回道:「你仲犀利啦,由『人』變成『神』,不過一樣咁有型!」聞得「男神」的稱號,子華笑謂:「真係笑話,依家世代『神』多過『人』呀,多個唔多咁囉,但如果真係嘅話,我想做『二郎神』多啲囉。」

《棟》片由籌拍、竣工到上映,前後花了足足兩年時間,子華感恩說:「故事由最初構思到依家,可以話已經面目全非,多謝阿佘肯等我咁耐。一眾幕後冇工開兩年都肯繼續同我癲,所以如果今次成功,希望佢哋有應得嘅嘢。」不過對於票房,子華卻選擇聽天由命,未有感到太大壓力。

談到拍攝時的難忘事時,戲中「角色造型多到數唔晒」的子華笑謂:「我最鍾意嗰場戲講我哋成班人去咗後現代嘅地府。拍嘅時候突然有成班人衝出嚟,話我哋拍緊條橋係佢哋起嘅。(好驚?)冇嘢,我咪尊重佢好似尊重佢條橋一樣囉。」

至於戲中「串星」包括許冠文、楊千嬅及張智霖等,位位分量十足,子華謂:「大家唔好誤會,我冇碌過人情卡,點敢叫許冠文開場亮一亮相、千嬅過一過鏡呀?我將構思講出嚟,係電影公司搵人嘅,當然佢哋(串星)嘅出現拯救咗我,真係好多謝呢班朋友。」

黃子華化妝﹕Judy Cheung
黃子華髮型﹕Helen Wong@Fifth Salon
佘詩曼化妝﹕江中平
髮型﹕Seiko Sin@Hair Culture