數百人圍觀！古巨基玩Busking癱瘓銅鑼灣

歌手古巨基（基仔）與太極成員Gary Tong、黃丹儀及一班樂手等，到銅鑼灣街頭演出，，現場一早逼滿數百人，癱瘓整個街頭，場面墟冚！工作人員不停叫途人退後，否則活動不能開始。大會原定於下午3時30分開始，但因塞車及機件問題，基仔接近3時50分才現身，群眾即時興奮歡呼！基仔說：「你哋好嗎？今日除咗粉絲仲有好多親朋戚友，好開心第一次喺銅鑼灣Busking。上面都有人，好似紅館咁，山頂同後面嘅朋友你哋好！」他指很多人提供了選曲的建議，他先選唱經典歌《友共情》：「呢首歌係咪陪住大家成長？即係你哋都唔細啦，好多童年回憶。」

介紹5歲的小鼓手

基仔形容他的樂隊陣容強大：「十幾人，嚟自五湖四海，有職業樂手，又有做Busking嘅朋友。」他特別介紹只有5歲的小鼓手Rondi：「佢好鍾意打鼓，佢嚟自音樂世家，今日爺爺同爸爸都喺度演出。佢仲有喺我新歌微電影演出，多才多藝，第時我跟佢搵食，一齊做演唱會，其實佢先係今日嘅音樂總監！佢平時喺屋企練鼓，未試過咁表演，要畀好大鼓勵佢！」基仔又笑言就甩褲，因為身上有耳機和收音咪，然後就演唱新歌《初心》。

卡通片《勁歌金曲》

提到大家對Busking的選曲，基仔笑指好渣：「冇新意，我要人估唔到㗎嘛，梗要做啲新嘢畀大家。呢首歌好長氣，有冇聽過我嘅《勁歌金曲》？已經13年前，要做啲新嘢，我準備咗卡通片歌嘅《勁歌金曲》，有咁上下年紀嘅都應該聽過。好考驗我，啱啱練起就要表演。」歌曲由《美少女戰士》、《IQ博士》及《問題天天都多》等組成，基仔邊Un邊唱，十分投入！期後觀眾大叫Encore，基仔笑說：「你哋以為演唱會？」觀眾點唱《藍天與白雲》，基仔笑說：「點唱？我唔記得咗，老喇！呢首好Old School。」已離座的樂手走回頭，最後基仔與觀眾大合唱《藍天與白雲》：「今日玩得好開心，有機會再嚟過玩突發Busking，樂隊依家要返紅館幫周慧敏做演唱會，我都趕過去啦。如果大家有飛，今晚一齊玩過！」

----------------------------

東網巨星開咗ig喇，大家快啲follow啦！