羅嘉良減產享天倫 羅仲謙搏殺養楊怡

20180203
東網電視
更多新聞短片
兩個愛妻號擔起頭家。
藝人羅嘉良與羅仲謙兩位已婚男人,另一半同是圈中人,兩位太太亦甘願為家庭退下火線,搵錢責任由男人負責,名副其實男主外、女主內。育有將近5歲囡囡的嘉良,直言現時一年一作品,其餘時間全天候享受家庭樂;相反正值搏殺期的阿謙則笑指獲太太楊怡開綠燈向前衝,自言寧願當「跟得丈夫」陪太太開工,也不欲太太辛苦當「跟得夫人」!
每年一劇夫妻輪流湊女
55歲的羅嘉良與33歲的羅仲謙雖然相差廿載有多,但他們對待家庭的態度毫無代溝,均是愛妻號,不欲另一半過分操勞,寧願扛下搵錢責任,Man到爆!難怪內地女星蘇岩與視后楊怡也甘願減產,乖乖當老公背後的女人。
與蘇岩結婚逾8年的嘉良,現時育有一名將近5歲的囡囡,嘉良指太太雖然有戲癮,但為了家庭及年紀尚小的囡囡亦願意減少幕前演出,他說:「太太有份參演馮小剛嘅電影作品最近上映,佢近年產量的確少好多,主要專注照顧屋企,我就睇有合適角色就出去拍。」
談到太太減產令他的擔子加重,嘉良說:「太太同我講,叫我唔好咁辛苦,做少啲啦!其實呢半年我拍咗3部劇集,佢就叫我休息唔好再接,其實都啱嘅,咁其中一部都係分上、下集,下集遲啲拍,自從我喺內地拍嘢之後,每年都只係一部起兩部止,盡量希望多啲時間享受吓,放喺家庭時間多啲,所以我同太太會分配好時間,佢拍嘢我就喺屋企,我拍嘢就掉轉咁。(追多個小朋友?)唔追啦,夠啦!」
已定居北京10年的他,對於當地霧霾情況嚴重,嘉良指當地政府今年已着手處理空氣問題,嚴禁燒煤,至今情況已大有改善,一年僅得幾日出現霧霾,令居民終可放下心頭大石。
跟得老公生B順其自然
與楊怡新婚一年多的阿謙揚言現階段屬於拚搏年,只要有好角色也願意嘗試,相反太太工作量卻大幅減少,他說:「阿怡以往長年累月未停過,依家就180度轉變,由全年不停拍,到依家係一年大概一個作品。(享受嗎?)對佢嚟講係好舒服,早排佢拍劇一日拍12個鐘,對佢係食生菜咁容易。(你做跟得老公嘛!)當時我未開工,咪兼職做太太司機,咁啱結婚一周年,咪陪佢去布拉格外景囉!(阿怡有冇叫你唔好咁辛苦?)冇喎!佢叫我辛苦啲添,咁自己都仲需要拚搏,唔會咁快停落嚟,依家年代唔同,市場係同成個亞洲競爭,所以要把握機會。到有一日我可以選擇揀劇本,先至為興趣都未遲。」
問到生仔大計,阿謙說:「順其自然,結婚有BB都冇所謂,但呢樣唔只係女性責任。(太太飛嚟搵你囉!)我唔畀佢跟住我,喺錄影廠好似霧霾咁,同埋拍戲唔多時間陪到佢,倒不如留喺香港,到我一休息就訂機票返香港陪佢仲好啦!」
塞錢落你袋!前輩教眼神做戲
最近嘉良與阿謙合作演出新劇《無間道》,已非首次演反派的嘉良,不諱言愈演愈難,為了不讓觀眾看重複的角色,今次特別把聲線Tune沉,問到對演黑警的阿謙有何評價?嘉良說:「佢好努力、投入同認真,睇到佢不斷進步,愈演愈穩。」
阿謙對前輩的讚賞開心不已,表示開拍前曾獲對方「袋錢落袋」:「佢話我眼睛黑白位太分明,太亮Bling Bling,做複雜情緒會係一個缺點,建議我眼神可以冇咁乾淨,混濁啲,同埋教我點控制聲線,後來我發覺瞓唔飽嘅狀態係啱啱好,唔係唔專業,係唔畀自己100%瞓好飽,結果出嚟眼神好好多。」
場地:香港帝苑酒店
羅仲謙服裝:NEIGHBORGOOD @ EXI.T
化妝:Leo Tam @ Annie G Chan
髮型:Jacky Leung @ IL Colpo
----------------------------
東網巨星開咗ig喇,大家快啲follow啦!