任達華幫衛詩雅招親 嘉玲借桃花:過嚟捐吓

20180214
東網電視
更多新聞短片
快啲搵番個伴啦!

藝人劉嘉玲、任達華、衛詩雅等於維園齊齊行年宵,宣傳英皇電影《我的情敵女婿》,劉嘉玲被問到情人節將如何度過?她笑謂無法與老公梁朝偉慶祝:「今日由朝做到晚,佢喺屋企唔嚟啦,啱啱先返香港!(再慶祝?)冇得慶祝啦,做完都好夜,返屋企開支香檳囉!(有冇準備禮物?)有,心意,係咩就唔話你知啦!」問到會否送戲飛給老公?她笑指不需要,任達華則指梁朝偉應包場,談到梁朝偉目前為拍戲而將頭髮剪短,嘉玲被問會否送頭髮?她笑謂:「唔使啦,髮型幾好睇!」

2019要買樓

任達華則自爆忘記訂花送給太太琦琦,她說:「今日起身,唔記得咗買花,大劑啦!後來琦琦拎花畀我,我真係冇面!(補鑊?)偷吻一次囉!又會咁烏龍嘅我!平時好浪漫㗎嘛!」嘉玲叫對方買番層樓給太太,任達華笑謂:「2019年決定,要儲錢㗎嘛!拍多啲戲!」單身的衛詩雅則笑指好彩有首映,更約了一班單身朋友前來欣賞電影,劉嘉玲聽聞對方沒有男友表現驚訝,任達華則表示要為對方找男友,但首要條件是懂得游水,又大讚方力申幾好,可以與詩雅一邊拍拖一邊游水,衛詩雅則尷尬笑指全香港人都在幫她招親。

嘉玲未行過花市

談到行花市,劉嘉玲表示:「我從來都未行過,我年貨都辦齊㗎喇,今日想感受下啲氣氛!」任達華則表示小時候住灣仔,故每年都會行花市,不過近年已經沒有行,詩雅則表示每年年三十晚都會行花市,被問是否要準備買桃花?她笑謂:「要偷㗎!偷一粒然後入利是封,擺喺枕頭底,就會有桃花!不過我未偷過,諗住下年擺檔賣嘢食!」任達華則笑指偷東西犯法,劉嘉玲則提議衛詩雅前往她家中拜年,因為家中有桃花,她說:「嚟捐下棵桃花,過嚟我度啦,萬試萬靈㗎!」

任達華笑衛詩雅賺得多,不過就被記者指單位物業最多的是他,任達華則拉埋劉嘉玲落水,笑謂:「我點及嘉玲,我十間都唔及嘉玲一間啦!」劉嘉玲即謂:「你講咩呀!唔好咁大聲呀!人哋真係以為我有好多錢身家!」

----------------------------
東網巨星開咗ig喇,大家快啲follow啦!
https://goo.gl/KGuo2N