侯煥玲離世：67歲入行為親人終身不嫁

資深演員侯煥玲在睡夢中離世，享年95歲！她有別其他甘草演員從小入行的經歷，67歲之齡對好多人嚟講都已經退咗休，不過侯煥玲先至啱啱開始踏入璀璨銀色旅途，至91歲仍然為電影業打拚！

侯煥玲家有十兄弟姊妹，自雙親離世後便各自生活，當時僅得九歲的細佬由侯煥玲帶住嚟香港搵食，因要照顧親人，她便決心終身不嫁。侯煥玲一生不停工作，三十多年前因病辭去家傭工作，在老人中心巧遇臨時演員阿頭，見侯煥玲精靈活潑、身手敏捷便邀請她參與電影演出，開頭都係演路人角色，第一部正式有對白嘅電影就係《喋血雙雄》，據知當時有份演出嘅曾江都讚佢講對白講得好。

其後侯煥玲的演出獲得肯定，更不斷參與演出大片，第一次同周星馳正式合作是《審死官》，之後又喺《破壞之王》客串幫孫仔買張學友演唱會門票嘅阿婆，慢慢就成為咗「周星馳御用婆婆」。

於電影《六樓后座》中飾演Sexy Suzy一角，其角色之重要更帶起結局「食屎」的橋段，侯煥玲於91歲演出最後一套電影作品《李碧華鬼魅系列：迷離夜》，作為甘草演員的侯煥玲克盡己任絕對值得令人尊敬！