吳浩康「金膝」招牌亂掃情場

20180225
東網電視
更多新聞短片
Deep絕對係情場老手,犀利呀!

情人節啱啱過,嚟緊係中國情人節正月十五,雙雙對對梗係Happy,但吳浩康就陰功豬嘞!本來坐定粒六同富貴女友李昭南計劃結婚,仲話自己浪子回頭生生性性,但立春都未到就被飛!雖然話佢失戀多過食飯,但痛到喺街頭爆喊,堂堂大男人忍唔住公然落淚,成條被女飛嘅可憐蟲咁,真係我見猶憐!

喊,對於真性情嘅佢嚟講,等如呼吸一樣自然,早排開個人演唱會,成晚變咗演喊會咁,睇佢喊好似聽佢唱歌,一時攬住楊受成喊到決堤咁話:「多謝你老闆!」轉頭又話多謝老竇、老母同三家姐撐到盡,淚浸九展!我Nuts 哥成日都話溝女唔使用劍嘅,咩有樓有高潮、高富帥乜Package都假,吳浩康就係成功人辦,要寫個服字畀佢嘞!唔單止識得用眼淚征服女人,下身更天賦異稟,有對「金膝」招牌,親身示範男人唔需要有膊頭,最緊要有膝頭!男兒膝下有黃金,豈肯低頭跪婦人,但佢嘅膝頭明顯被撒旦吻過, 零舍高鈣夠硬淨,能屈能伸!

野花溫柔過家花

雖曾有「壞孩子」之稱,打架或背女偷食乜都有,話晒血氣方剛,有邊個後生仔冇錯過?入行16年,見報嘅關鍵字都係離不開「知衰」、「道歉」等,就係識得跪低肯認衰仔,唔單止公司繼續畀機會,而且女死女還在,原諒他七十七次!肯認低威認衰,唔係個個男人做得到,面皮緊要過麵包皮,好多男人情願冇飯食,都唔肯認錯。其實女人把口話嬲豬,都係愛你緊你先至發脾氣,但永遠好多男人都參透唔到呢點,成日覺得隔籬飯香,外邊嘅野花總係溫柔似水過家花,簡單啲講,要共患難嘅話,你話二奶定大婆肯同你捱?

「洗剪吹」全套做齊

男人做錯,女人發脾氣,都係想佢爭氣,做男人最怕係自卑唔爭氣,抬唔起頭,即係不舉,做乜都唔成啦!吳浩康就唔同,證明可以做錯,同樣都可以做好,拍心口硬繃繃照抬起頭表現爭氣,你係佢女友,見佢咁硬咁有正能量,點會唔畀多次機會?

況且佢冧女真係有一手,做晒好多男人唔會做嘅嘢,首推係會幫女友拎手袋,呢個係好多男人嘅大忌, 認為男人老狗拎女人手袋,貪好睇咩!至於有冇踎低綁鞋帶就唔知嘞,只知有時大風啲又攬又抱話驚吹親,仲幫女友撥埋頭髮,話驚吹亂喎!同佢首名曲一樣《洗剪吹》,乜服務都包晒!服侍周到,唔怪得當年事業開始插水,女友胡定欣依然不離不棄,轉嗒莊思敏後,即發生電梯媽人事件,有人爆Seed:「你都係着我舊鞋咋,八婆!」條氣唔順,明嘅!

買餸煲湯 齋聽都Warm

攣都拗番直,將曾為女同性戀者嘅拿督千金莊思敏變為真女人,明明am變fm,成條頻道扭轉晒,黃河入海流,仲唔威呀?就算分手,莊思敏都不忘讚佢夠細心唔大男人,就連差啲入門嘅鍾舒漫,都一樣讚佢夠住家男,戒酒、戒蒲,落街買餸煲老火湯,齋聽都Warm啦!就係衰為食,本住食得唔好嘥,可能想臨做老襯前兩年歎到盡想嚟個「百人斬」啦,所以一個月內連?六女,結果「骾親」,被悔婚收場!話時話,以佢「失戀王」嘅彪炳輝煌嘅失戀戰績,好快又有着落,一女死一女鳴呀!

----------------------------
東網巨星開咗ig喇,大家快啲follow啦!
https://goo.gl/KGuo2N