突然返港拍劇　陳鍵鋒：一年一度慶回歸

藝人陳鍵鋒（Samuel）到將軍澳為劇集《火速救兵IV》舉行開鏡禮，飾演坍塌搜救專隊隊長的他直言之前不太了解這專隊：「近年就比較多人熟悉，但唔係好想見到佢哋咁多，譬如過年前大埔單意外就有佢哋協助，因為要固定現場環境同鋸開啲嘢帶傷者出嚟。」問到其角色可算辛苦？他笑言不算：「始終隊員同隊長有啲分別嘅，隊長可以指手畫腳、負責諗嘢。我想藉呢個機會畀大家諗吓佢哋每日工作嘅心理壓力好大，所以要支持同愛錫消防員。」

他在劇中要拯救飾演殺人犯的彭懷安，醫生表示只得幾分鐘時間：「嗰陣先知原來佢係殺小朋友嘅通輯犯，心理壓力真係冇辦法想像，但都要好專業同冷靜咁決定點救。同埋諗起大埔單意外，佢哋入到去見到嘅景象，都要冷靜工作，好敬佩佢哋。」

讀完抽血員文憑

說到很少回港工作，Samuel笑言是一年一度慶回歸，但很喜歡為電台拍劇，因為時間較短和故事很吸引，又指這系列已邀請他合作3、4年，不過遷就不到時間，今次就終於拍到：「我啱啱讀咗抽血員文憑，同我教潛水都有關係，因為要急救，我以為咁啱佢哋搵我演救護員，但原來係坍塌搜救隊，都幾有興趣。」至於會否多點在港開工？他直言未定，暫時想專注學業：「同埋故事、人工，好多因素要衡量，我都鍾意喺香港開工，可以近啲屋企。」他表示打算修讀歐洲學院開辦的演戲或藝術網上短期課程，希望在內地邊賺錢邊進修。

----------------------------

東網巨星開咗ig喇，大家快啲follow啦！