半裸玩火拍海報　張敬軒人頭變爐頭

由英皇娛樂主辦的《Hinsideout 2018 張敬軒♭♭演唱會》於6月15日至17日，一連三場假紅館舉行，耗資逾百萬宣傳，在紅隧廣告板率先曝光。軒仔為演唱會拍攝海報，今日佢就喺自己社交網站Post咗段影演唱會海報花絮，半裸噴晒火，即刻被網民瘋狂洗版。

睇番條片，髮型師好認真咁喺軒仔個頭上面噴火，而現場工作人員就好玩嘢咁拎住燒烤叉喺軒仔頭上燒棉花糖、燒雞翼，期間仲滴咗滴雞油落軒仔個額頭，堅係燒嘢食㗎喎。點解玩火咁激？軒仔話：「今次演唱會主題叫『Hinsideout』，概念由SK AllRightReserved主理人主理，希望將我另外嘅幾面、大家喺螢幕外見唔到我嘅、最deep down嘅性格特質變成音樂，帶上舞台畀大家睇。所以我連衫都冇着㗎，個頭頂又起晒火。」談及點解玩火，軒仔說：「火嘅意思就係我將裏面團火都燃燒埋出嚟。」

求突破諗爆腦

相隔四年再喺紅館開Show，軒仔話最難係點樣突破上次嘅演唱會：「因為2014年有譚玉瑛姐姐嗰Part嘅《青春常駐》、有好Sexy嘅係我同Shirley姐姐（關淑怡）嗰Part嘅互動。一眨眼四年過去，今次呢個演唱會做乜嘢好呢？今次會㨂好多我自己鍾意嘅作品、大家好鍾意嘅作品，用一啲好唔同嘅形式去演繹出嚟。」

講番個「火頭」先，唔講唔知，原來呢個係一個頭髮Treatment（治療），火焰護理，一啲乾燥、受損、髮尾開叉同較弱髮絲經燃燒後自然脫落，做完呢個Treatment後，頭髮會更豐盈、更有彈性㗎。」

千祈唔好模仿

咪睇軒仔好似好鎮定，軒仔話其實事前都有少少驚驚，：「不過之前已經有好多個幕後工作人員試過都安全冇事。同埋呢個Treatment嘅主理人－印度髮型師Mr.Gala咁啱又喺香港，SK又搵到佢、佢又有興趣玩，所以就嚟咗幫手。成個過程係好有趣、好刺激、好正！」做完「Treatment」，啲頭髮係咪真係靚咗先？軒仔話：「真係『令』咗同埋滑咗！我本身有少少乾旱嘅頭髮，做完呢個Treatment之後全部都冇晒！」不過喺呢度都要提提大家，Treatment係由專人處理，大家千祈唔好模仿呀！

拖暖風機開工

睇住啲火燒到「冚冚聲」咪以為一定熱到爆炸，其實拍攝當日氣溫只得攝氏七度，但軒仔要除晒衫，真係玩住冰火咁影㗎，軒仔話：「梗係凍到飛起啦！所以行到邊度都要拖住個暖風機，哈哈！」