《復仇者3》導演爆電影晒冷回顧18部超英片

漫威（Marvel）重量級超級英雄電影《復仇者聯盟3：無限之戰》（Avengers: Infinity War）即將出爐，導演羅素兄弟（Russo Brothers）近日爆出他們執導的《復仇者3》與《復仇者4》，將會包括漫威10年來，18部超英片的故事，即係有幾十個超英，仲有齊18個故事，劇情畫面都係雙加大！Joe Russo表示：「由《鐵甲奇俠》開始每個漫威故事，呢兩部《復仇者》電影都會有敘事線索，係所有故事嘅高潮。」

此外，漫威近日宣布提前《復仇者3》的北美映期，更於官方社交網Twitter與「鐵甲奇俠」羅拔唐尼（Robert Downey Jr.）搞笑互動作公布！羅拔於漫威有關《復仇者3》原定5月4日上映的留言中作回應：「我可唔可早啲睇到？」漫威一方就話：「Mr.Stark，為你做咩都得，4月27日？」羅拔最後仲追問可唔可以同全世界嘅朋友一齊睇，獲漫威「答應」，順手公布全球映期提前到4月27日。電影將於香港時間4月25日率先在港上映。

此外，迪士尼今日公布於《復仇者4》後，6部超英片排隊上映的日期，時間由2020年7月至2022年7月。