艾美琦自爆成日畀鬼責：把聲話我死八婆

藝人艾美琦與契妹李紫彤晚上現身旺角街頭，為一套靈異電影宣傳。艾美琦自爆經常「畀鬼責」，聽到人毛骨悚然：「我出埠好容易遇到呢啲嘢，最驚嗰次係瞓瞓吓覺，聽到有把聲由遠至近咁鬧我死八婆，聲音近到耳邊時，聽到由一把聲變兩把聲、兩把聲再變四把聲......足足歷時幾分鐘，我成個人唔郁得！好彩後嚟終於睜開眼。」

艾美琦又指向李紫彤謂：「佢話教我跳舞，我去佢屋企練得太累瞓着咗，我發現畀鬼責，醒咗就話畀佢聽佢屋企有鬼，叫佢即刻搬，但佢唔聽我講，住到依家囉。」李紫刐無奈謂：「佢同我講，我話畀佢知其實我一早都知，但7,000蚊租成700呎咁平租，去邊度搵？我都住慣嘞，亦知問題喺邊，處理咗。」

問到艾美琦可會考慮接拍鬼片，她答：「開工有人陪冇問題。其實片場成日都有怪事，尤其開大夜班、凌晨成日都有嘢發生，例如忽然停電、有嘢跌落嚟咁，試過有工作人員畀嘢跌落嚟爆晒缸添呀。」