《刑偵》重播！睇陶大宇點變「師奶殺手」

被喻為「神劇」的無綫劇集《流氓大亨》，早前深夜重播都成為熱話，仲引發煲劇潮。而劇集日前播出大結局，並由《刑事偵緝檔案》接棒。其實呢部劇當年已經係話題之作，唔止令陶大宇成為「師奶殺手」，仲破記錄成為史上第一套喺同年播出續集嘅劇集，最高收視更達38點，成為嗰年嘅收視冠軍。

事隔23年，劇集再次重播，即時獲網民熱議。好多網民表示主角陶大宇，當年個樣青靚白淨，難怪迷倒咁多師奶，成為「師奶殺手」啦！而蘇玉華就好似食咗防腐劑咁，咁多年嚟個樣都冇乜點變。相反，有網友就話主角之一嘅郭可盈個樣變化較大，當時嘅佢有少少「包包面」，真係好Pure好True！而好多網民都話最深刻嘅，就係陶大宇經常將郭可盈劇中英文名「Jessie」，讀成「姐匙」同「車匙」，認真搞笑！

大宇接受電話訪問，直言當年《刑》劇九成戲份都落在自己身上，他笑說：「拍咗三個幾月，每日只係瞓到幾個鐘。（咁辛苦都Keep到小鮮肉嘅樣？）哈哈！算係咁啦！至於將Jessie讀成車匙，我當年已經知，拍嗰時個個都笑，我又覺得大家拍得咁辛苦，當係小娛樂，所以冇刻意改正！」

另外，唔少多年冇見嘅面孔都成為網民討論嘅對象，除咗有近年淡出娛樂圈嘅兒童節目主持人梁詠琳之外，其中飾演收銀員嘅女演員，原來係著名粵劇演員蔣文端，有網友就話估唔到呢位國家一級演員都有份演出。此外，亦有網友指希望《刑》可以重播至第四輯，等大家可以睇埋古天樂嘅演出添！

----------------------------

東網巨星開咗ig喇，大家快啲follow啦！

https://goo.gl/KGuo2N