睇好林超賢!楊受成「豪送」七千萬新樓

20180326
東網電視
更多新聞短片
楊受成出席慶功宴時話會叫林超賢(左)去攞個七千幾萬嘅單位!

英皇電影《紅海行動》上映至今,票房勢如破竹、好評如潮,今晚電影公司於灣仔舉行慶功宴,英皇集團老闆楊受成、博納影業老闆于冬、導演林超賢以及一眾演員任達華、蔣璐霞、王雨甜、麥亨利等出席,楊受成對於該片票房邁向45億元表示高興,問他是否賺好多?他說:「唔係,同地產、股票差好遠,但都好開心,身為出品人、老闆,套戲叫好叫座,朋友打嚟會同我講『楊生,套嘢好睇,好緊張、啲場面又好、演員又好!』咁聽到都好開心嘅!」

預計香港票房九百萬

電影獲如此佳績,會否考慮開拍《紅海行動》前傳?楊受成表示:「唔知,要睇番魔鬼導演(林超賢暱稱)。(目標票房五十億?)難啲,希望可以貼近五十億,內地會上映至四月十五日,票房真係要睇吓同期,有啲乜嘢其他戲上映,如果遇到啲比較重型嘅外國電影,咁就會難啲,要睇對手!香港票房我都好滿意,一千萬未必有,預計去到九百萬左右。(你都好老實!)我做生意唔會亂吹。」

撐林超賢成為香港最好嘅導演

林超賢為英皇拍了不少賣座電影,問楊受成可會覺得對方是福將?他說:「我2011年出嘅自傳都有寫,林超賢嘅片酬反映唔到佢嘅實際價值,當時有啲人仲話我梗係咁講,因為我簽咗佢三部戲,想幫佢宣傳,但我唔係為宣傳,依家全港嘅大導演,我唔開名喇,將來佢(指林超賢)一定會超越佢哋,成為最好嘅一個。我今日再講,佢仲有得再去,因為佢份人好堅持,好着重電影嘅質素。(會否考慮加簽片約?)佢肯就最好,依家個個老闆排隊畀錢佢使。」

送七千幾萬嘅新盤

票房如此火紅,不少人都關心導演林超賢會否有分紅,楊受成表示:「有,我私人都會封利是畀佢,就算于冬(電影另一投資方老闆)唔畀我都會畀,分紅會好可觀,(買到幾層樓?)唔講得,但一定夠買樓,封利是就未必得。(你旗下咁多樓盤,可以畀一個佢?)嚟緊有新盤,其中有個七千幾萬嘅單位,我叫林超賢去攞,之後我同佢慢慢計。(要計?)梗係要計,個樓盤未開放畀人睇,一開放佢會係頭幾個去睇,仲有幾個導演都會去睇。」

加林超賢人工

今晚慶功宴有大抽獎環節,獎金相當和味,楊受成:「于冬好大方,我攞幾多佢就會攞幾多!(廿、三十萬?)一定多過三十萬啦!」其後楊受成又向于冬表示要加林超賢人工,真係好器重林導呀!

----------------------------
東網巨星開咗ig喇,大家快啲follow啦!
https://goo.gl/KGuo2N