趙學而專向屋企人發脾氣：情緒好難控制

歌手趙學而最近忙於籌備紅館騷，很感激老公在身邊支持，但坦言二人曾經非常火爆：「人嘅情緒好難控制，尤其最壞嘅脾氣一定發喺屋企人身上，但我哋唔係互相發脾氣，所以好易處理。有時有啲唔開心、唔舒服或者忟憎，我哋一定唔會收埋，會發道氣出嚟，跟住再溝通因為咩事。」學而自言以往十分投入演藝事業，語氣有時會很倔：「人哋唔明我，覺得我脾氣好大，但邊個後生仔脾氣唔大？不過近排已經收火，當人經歷多咗，會諗多咗點解件事會發生，應該點樣處理自己嘅情緒，然後先處理到問題。」

提到早年患抑鬱症時獲林一峰邀請參演舞台劇，學而大讚做舞台劇的朋友很有火和樂天：「佢哋個氣氛令我好快追番自己應有嘅步伐，當然嗰時未到依家咁，可以好樂觀咁面對所有嘢，但係起碼有好大進步，我好多謝佢哋令我可以過一個比較正常嘅人生。」她透露本來與一峰不熟，後來才發現對方很喜歡自己的歌曲。

至於劇集《皆大歡喜》後，學而拍攝的劇集並不多，她就否認拍到怕：「我係比較Open嘅人，入行咁多年嚟，我覺得邊個範疇適合自己就去做。我始終係由主持出身、拍過劇，訓練班樣樣嘢都需要學，之後又唱歌，我用得着嘅武器都幾多，問題係大家畀唔畀呢個機會我、覺得我勝唔勝任。」雖然她最近的電視劇角色戲份不重，但她認為可以帶出強烈訊息給觀眾：「亦都好赤裸咁話畀人聽，現實就係咁。我覺得年紀大咗，我可以放開胸襟面對所有現實。細個我覺得唔係咁嘅，但經過咗病之後，睇到好多嘢令自己『化』咗，願意接受呢個世界好多殘酷嘅事實，用一個舒服嘅方法面對，令自己好安樂咁繼續行我嘅人生。」

----------------------------

東網巨星開咗ig喇，大家快啲follow啦！

https://goo.gl/KGuo2N