港版木村蔡興麟歸位 全城集氣召喚陸家俊

20180403
東網電視
更多新聞短片
《廣播道Fans殺人事件》入面嘅鄭梓浩、蔡興麟、黎明詩相繼出番嚟,係爭陸家俊咋!

近期唔少九十代年歌手返晒出嚟,黎明詩、黃翊、洪楗華、何婉盈都出嚟唱番兩咀,真係集體回憶返晒嚟,不過講到九十年代歌手,真係不得不提下蔡興麟,當年連軟硬天師首《廣播道Fans殺人事件》入面都有句歌詞「蔡興麟我哋支持你!」當年佢分量真係舉足輕重。

蔡興麟1990年參加全美華裔青年歌唱大賽獲得冠軍,1992年美國返港後推出首張唱片《為了你,為了我》,唱到街之巷聞一炮而紅。之後又同彭家麗合唱咗一首情歌《現代愛情啟示錄》,真係唱K必備金曲,加埋佢精緻帥氣既外貎,再加上一頭長髮,所以被封為情歌王子,又或者「港版木村拓哉」。

1992年一個電台搞咗個夏日綠游游活動,佢仲有機會同歌神張學友、張智霖一齊影咗張泳褲大合照,雖然係靠邊站但相信呢張相大家都好有印象,因為係得佢上身加咗件Top,相當鍚身。1995年蔡興麟仲有機會同天后梅艷芳喺一個賑災活動合唱咗一首《心仍是冷》,呢啲機會真係唔係人人有,就係咁佢同梅姐仲Friend埋。

不過,1995年蔡興麟就返咗內地發展,仲以唱歌同拍劇雙線發展,可以話係第一代返內地掘金藝人。不過講蔡興麟就唔可以唔提埋佢阿媽,因為佢阿媽就係香港粵語片藝人沈月華,姨媽就係60年代粵語片藝人沈芝華,真係系出名門呀。

講開蔡興麟,就要講埋陸家俊,佢除咗同樣被軟硬唱成「陸家俊我哋支持你」外,連組合I Love You Boyz喺廣播劇中,少爺占都叫「陸家俊」, Donald就叫「蔡興麟」,可見兩位90年代歌手個分量真係十足。陸家俊1990年以15歲之齡時參加華星新秀歌唱比賽得亞軍,佢嘅成名作《依然深愛你》同《十八歲的憂鬱》真係冇得輸,不過最可惜係佢1994年因拍攝歌曲《龍吐珠》MV時受傷最終更退出娛樂圈,去咗到美國讀書,好多人依家都好掛住佢。

---------------------------
東網巨星開咗ig喇,大家快啲follow啦!
https://goo.gl/KGuo2N