《偶像練習生》結果出爐　范丞丞成為探花

內地真人騷《偶像練習生》播出至今大受歡迎，今晚終於嚟到最後一集，並選出九人男團NINE PERCENT嘅出道成員，而最終結果由蔡徐坤（第一名）、陳立農、范丞丞、Justin、林彥俊、朱正廷、王子異、小鬼、尤長靖這九人組成男團出道。當中內地女星范冰冰一直力撐參賽嘅細佬范丞丞，今日仲喺微博發文為佢打氣，寫道：「4個多月的努力！今天總決賽！姐姐今天為你打Call！在證明你自己的路上！堅持下去！無論結果如何！請享受所有過程！加油！」

有姐姐范冰冰嘅鼓勵，加上父母到場支持，范丞丞喺決賽狀態大勇，染一頭紅髮嘅佢，以紅色Lace衫嘅狂野造型示人，相當搶眼！最終范丞丞以超過1,500萬票登上第三名，成為「探花」；與陳立農、朱正廷及王子異等人將組成Nine Percent。范丞丞喺台上一一感謝粉絲、節目導師及喺現場嘅父母，而鏡頭亦影到佢父母喺台下舉起寫住「范丞丞」嘅燈牌，恭喜晒！

----------------------------

東網巨星開咗ig喇，大家快啲follow啦！