聽到都驚!林超賢預彭于晏閉氣潛水兩分鐘

20180408
東網電視
更多新聞短片
彭于晏(左)要做定準備喇!

導演林超賢下午到旺角朗豪坊,為英皇電影《紅海行動》謝票。談到內地票房已衝破36億,林導表示:「內地起碼會上映到15號,之前畀啲荷里活電影打低,排片量亦減咗,但我哋又再攀番上嚟,每日進賬5、6百萬(人民幣),我個人希望落畫過到36.5億啦。」

而日前林超賢到訪馬來西亞,為籌拍英皇新片《緊急救援(暫名)》睇景:「遲啲仲會去比利時、馬耳他及墨西哥等地,嗰啲地方喺海邊都搭建咗大型片廠,比利時嗰度有個36米深嘅人工海底,男主角彭于晏聽到都咋舌,佢胸前咁偉大,肺容量都有番咁上下,起碼可以閉氣分幾兩分鐘啩?!」

林導坦言由於搭景及演員訓練需時,故會將原本8月開鏡押後到年底,除彭于晏外,其他角色未定,不過由於拍攝期起碼5個月,故不排隊與《紅》片一樣起用多張新面孔,至於製作費則約5億:「今次幕後團隊都會起用美國專業人員,鮑德熹亦會加盟,所以製作費一定貴。」據悉,今次林導以舊合約再為英皇拍戲,未有「坐地起價」,可謂相當抵用。

----------------------------
東網巨星開咗ig喇,大家快啲follow啦!
https://goo.gl/KGuo2N